Shillong, Nailar 31: Hadien ba ka tnat ki kam pynroi sor ka la aiti sha ka High Level Committee ïa ka Blue Print ha kaba ïadei bad ka jingpynkynriah ïa ki Harijan kiba shong ba sah ha Them Ïewmawlong sha ka jaka ba don ka quater jong ka Shillong Municipal Board kaba don ha Bishop Cotton Road na ka liang ki Hariajan kim pat lah satia ban rai la kin pdiang ne kyntait ïa kane ong Gurjit Singh u Secetary ka Shillong Harijan Panchayat Committee.
Haba ïa kren bad u Mawphor u Gurjit Singh u la ong ba kumba long mynta kaei kaba ka tnat pynroi sor ka tyrwa kam pat shym la ai jingtip ne khot ïakren bad ki hynrei u la ong ba shen hi ka HPC kan shong pyrkhat la kin pdiang ne kyntait ïa kane bad u la bynrap, “ha ki por ba lah dep, ka Harijan ka lah dep kren shai sha ka sorkar ba kam treh ïa katei ka jaka namar ba ka la khapngiah palat na bynta ki 342 tylli ki longïing”.
Shuh shuh u la ong ba na ka liang ka HPC kan shong pyrkhat bad u nongsaid aiñ jong ki ban pyrkhat ïa kiei ki lad ki lynti kiba dang don na ka bynta jong ki bad ruh ban pan ka jingmut la kin pdiang ne kyntait ïa kane.
“Ban kren palat ïa kane kam dei ka rukom namar tang kaei kaba don ha ka Blue Print ngim pat ïohi bamar kaei kaba ka sorkar ka ai sha ki lad pathai khubor kam ju ïathuh lut lehse ka pyrshang wat ban pynkulmar jingmut ïa ngi ruh, ngin ap shuwa ïa ka sorkar ba kan khot ïakren bad ngin sa peit kaei kaba mih na ka jingïakren bad ka sorkar,” u la ong.
