Shillong, Risaw, 29: Ka tnat Pule puthi ka sorkar jylla kan dang hap ban pyndep khatduh ïa ka action plan na ka bynta ban pyntreikam ïa ki jingmynjur jong ka Meghalaya State Education Commission (MSEC).
Halor kane u Myntri ka Tnat Pule Puthi ka sorkar jylla u Bah Lahkmen Rymbui haba kren sha ki lad pathai khubor ha ka sngi Nyngkong u la ong ba kane ka kam ka dang ïaid bad ym pat lah ban pyndep pura ïa ka.
Katkum ka jingong jong u, ka tnat ka dang pule ïa ki jingai jingmynjur bad ki don katto katne ki kam ba donkam ban pynbeit.
“Kan dang shim sa katto katne por ban wanrah ïa ki rukom pyrkhat kiba shai,” ong u Bah Rymbui.
U la bynrap ba ka sorkar kan buh hakhmat ban pyntreikam ïa ki jingmynjur kiba long suk ban pyntreikam, katba kito kiwei pat kiba donkam jingïasyllok bad ki nongshong shnong kan dang shim ka por kaba kham jrong ban pyntreikam.
Haba kylli, u Bah Rymbui u la ong ba hapoh ka tnat pule puthi ki kynthup ïa kiba bun ki seng bad ki nongshong shnong, kumta ka sorkar ka donkam ban pyndon bynta ïa baroh ha ka kam shim rai.
Na ka liang u Myntri u khlem da la lah ban ai ïa ka por ban pyndep khatduh ïa kane ka action plan, da kaba ong ba ka shong ha ki jyrwit jyrwat jong ki jingmynjur bad kaba donkam ka jingïasyllok jong ki nongshong shnong.
