Shillong, Nohprah 21: Ka Captain Williamson Sangma State University (CWSSU) kan sa long ka jaka pule kaba kongsan na ka bynta ka jingpule na ka bynta ban pynneh pynsah ia ki kolshor ki riewlum, lyngba ka jingthaw ïa ka tnat Tribal Studies kaba la buh ka thong ba pynneh pynsah bad ban kyntiew ïa ki ktien ka jylla kiba la don ka jingma ba lah ban duh noh bad kumjuh ruh ïa ki ktien ba la kren ha kine ki thaiñ riewlum.
Haba pynbna ïa kane ka jingsdang, u Myntri ka tnat Pule Puthi ka sorkar jylla u Rakkam A. Sangma u la ïathuh halor ki jingaiti jong ka sorkar ban pynneh pynsah bad ban ïada ïa ka kolshor kaba riewspah jong kane ka thaiñ lyngba ka pule puthi. “Ngi don ka thong ban pynneh pynsah bad ban ïada ïa ki jinghiar pateng ha ka kolshor lyngba ka pule puthi,” pynskhem u Myntri da kaba bynrap, “Ka jingkynthup ïa ka tnat Tribal Studies ka long ka sienjam kaba kongsan halor kane ka jingpyrshang jong ka sorkar.”
Haba pynpaw ïa ka jingsngewkhia ba bun na ki ktien jong ki riewlum ki la sdang ban duhjait, u Sangma u la ong, “Nga dei u Garo hynrei nga dei u riewlum na ka kynhun ba khot ka Atong. Nga kren ïa ka ktien Atong kaba la kren da kumba 20,000 haduh 30000 hajar ngut ki briew ha ka pyrthei. Kane ka ktien la kren da ki briew ha ki katto katne ki bynta jong ka South Garo Hills bad Bangladesh. Lada ngam kren shuh ïa ka ktien Atong, lashai hadien habud hapoh ka longïing kaba kren ïa ka ktien Atong, ki briew kin ym don shuh bad kan ym don shuh ruh ha ka rukom ka jingthoh, ne ha kano kano ka kot ka ban thoh ha ka ktien Atong. Namar kata ka donkam ban don ka jingpynneh pynsah bad kumjuh ruh ban kyntiew ïa ki kolshor ki riewlum bad kumjuh ruh ïa ki ktien ba ki kren.”
Ban pynthikna ïa ka jingtreikam kaba beit jong kane ka skulbah, la ai bor ïa u Vice-Chancellor ba dei ban shimkhia shwa nyngkong ïa ki tnat kiba donkam bad ban sdang ïa ki kam hikai ha kane ka jaka pule. La khmih lynti ruh ban pynsdang noh ïa ki Class ha u snem 2025, ha ryngkat ka jingïaid lang jong ka jingdonkam ban ïoh ka jingithuh ka jingpynïasoh ïa ki college bad ka university.
Halor ka mat jong ka jingdonkam ban ïoh ka jingithuh bad ka jingpynïasoh ïa ki college, u Sangma u la ong ba ka sorkar jylla ka la rai ban ieh ha ki jaka pule ba kin rai halor ka jingkwah jong ki ban pynïasoh bad ka Captain Williamson Sangma State University, ka ban sdang ïa ki jingai jinghikai bad ki jingpule jong ka ha ka snem ban wan.
“Ki la don bun ki college, kiba dang ap ban ïoh ka jingpynïasoh bad ka state university. Katto katne ki college sorkar ki lah ruh kumjuh ban rai la kin pynïasoh ne em,” u la ong da kaba bynrap, “Ngi dang thoh sha ki jaka pule ban rai halor kane ka kam.”
Katkum ka jingong jong u, ki college ki lah ban bteng ban pynïasoh ïalade bad ka North Eastern Hill University (NEHU).
“Namar ba ki college ki la pynïasoh bad ka NEHU, kin don barabor ki jingïaleh na kadaw ka CUET bad kiwei ki kam, ki don ruh ki jingmyntoi bad ki jingduhnong. Namar kata, ai ba ki jaka pule kin shim hi ka rai halor kane ka kam,” u la ong.
Shuh shuh u Myntri u la pyntip ba ka sorkar ka dang pyrkhat ban buh ruh ïa ka Shillong campus jong ka state university hapoh ka new Shillong township.
“Ngi la dep don ka jingïalang bad u Myntri Rangbah ban bthah ïa ka tnat pule puthi ba kan thoh na ka bynta ban ïoh ïa ka jaka na ka tnat ki Kam Pynroi Sor,” u la ong.
U la ong ba ki la don ki jingpyrshang ban ïoh ka jingmynjur na ka All India Council for Technical Education (AICTE) ha kaba kane ka kam ka dang ïaid mynta.
