Yn bteng ka UDP ban ïatreilang bad hapoh ka sorkar MDA ba la ïalam da ka NPP, ong u President ka UDP

Shillong, Naitung 08: U President ka United Democratic Party (UDP) u Bah Metbah Lyngdoh u la ong ba ka party kan ïaibteng ban kyrshan ïa ka sorkar ba la ïalam da ka National People’s Party (NPP) ka Meghalaya Democratic Alliance haduh ba kut ka samoi treikam.
Ha kajuh ka por, u Bah Lyngdoh u la banjur ba ka Regional Democratic Alliance (RDA), kaba dei ka jingïatreilang jong ka UDP bad ka Hill State People’s Democratic Party (HSPDP), kan dang don ka jingïatreilang.
Haba kren sha ki lad pathai khubor u President ka UDP u la pynpaw ka jinglyngngoh halor ka jingmih ka khubor kaba kynnoh ba ka party UDP kan wengnoh na ka jingïatreilang napoh ka sorkar MDA.
“Mynta bad naduh ka snem 2018 haduh u 2023, ngi la ïatreilang bad ka NPP, ngi la ïatreilang bad ka BJP, HSPDP bad ngi don hapoh ka shatri jong ka MDA-I,” u la ong.
Haba ïadei bad ka jingpyrshang jong ka UDP ban thaw ïa ka sorkar khlem ka NPP hadien ka Assembly elekshon 2023, u Bah Lyngdoh u la ong, “Ngim lah ban thaw ïa ka sorkar bad dei halor ka jingkyrpad jong u Myntri Rangbah ïa ngi ban pynïasoh bad ka sorkar. Kumta hadien ka jingïasyllok kaba janai bha la kyrpad ïa ngi ban ïaid shakhmat ban pynïasoh bad ka MDA-2.”
U nongïalam ka UDP u la khlem kren eiei ruh halor ka jingmut ban pynkylla ïa ka jingthung myntri jong ki arngut ki myntri ka seng napdeng ki 12 ngut ki MLA ka party.
Halor ka jinglong jingma ka VPP ïa ki seng riewlum ha Meghalaya, u Bah Lyngdoh u la ong, “Ngam tip ai ba ki paidbah kin rai.”
“Ngam shym la ïohi ba ka VPP ka dei ka jingma,” u la ong.
“Peit haba phi kren shaphang ka jingïatreilang dei ban sngewthuh shaphang jong ka. Haba poi sha ka jingïatreilang ha kane ka elekshon MP dei ban don tang u ne kawei ka kyrtong kumta la rai ban pynïeng ïa u kyrtong ha ka shab jong ka UDP ka bom.
Shuh shuh u la pyntip ba shen yn sa shong ka jingïalang jong ka RDA ban ïakren ïa kiba bun ki mat bad kumjuh ruh ïa ka kam jingïatreilang.