Nongpoh, Nailur 09: Ka ophis u Senior Superintendent of Police ka Ri Bhoi, ka la pyntip paidbah ba nangne shakhmat kan pyrkhing lut ïa baroh ki jaid kali ba kim dei ban pyndonkam bakla ne pynkheiñ ïa ki kyndon ba la buh da ka sorkar.
Kumba la pynlait paidbah, ka tnad Pulit na Ri Bhoi kan sa tehlakam ïa baroh ki Kali kiba pyndonkam beaiñ kum ka siren, ka jingtah ïitïong ïa ki Kali, ki jingpyndonkam ïa ki light kiba thaba pyrshah khlem da ïoh bor na ka sorkar.
Ka tnad Pulit na Ri Bhoi ka la mana lypa ruh ïa kino kino ki Kali kiba pyndait ïa kitei kiba long pyrshah ba ki dei ban loit noh mardor ban lait na ka jingshah pyngngat ha kino kino ki kyndon.
La ong ruh ba ka tnad Pulit lada ka lap ïa kiba pyndonkam bakla kin phah da ka e-challan bad ki loit ruh naduh ki siren, ki ïitïong, bad ki light ha ka jaka ba shah bat bad ïa ka jinglut jingsep ki trai kali ki hap hi ban pynlut.
Shuh shuh, la ong ruh ba kino kino kiba ïa leh pyrshah ka tnad pulit kan leh beit katkum ki kyndon aiñ bad kin nym map ruh wat ïa Kali sorkar kiba pyndonkam bakla la ki dei ki ML-01 lane ML 01 A.
