Shillong, Nailur 08: Hadien ar sngi shimiet ba U President ka Meghalaya Government Lower Primary School Contractual teachers’ Association (MGLPSCTA) u Babu Birbor Riangtem u la pynlong ïa ka jingshah thngan ba khlem buh por ha lynti ïaid kjat kaba don ha pyrshah ka Secretariat ban dawa na ka sorkar ba ka dei ban thung kam biang ïa ki nonghikai contract kiba ka sorkar ka weng noh ïa ki na ka kam ha u snem 2021.
Haba kren bad u Mawphor u Babu Birbor u la ong ba ha ka sngi Thohdieng ki para nonghikai ha kylleng ki jaka kin pynlong ïa ka jingïakhih da kaba shong shah thngan ha ki ophis ki SDSEO, DSEO bad ki katto katne kin wan sha Shillong ban leit aiti noh ïa ki kot ki sla bad ki syrnot jingpule kaba ki la pyndep sha u Lamphang ka ïing dorbar thaw aiñ ka jylla u Bah Metbah Lyngdoh namar ka sorkar kam shym la kheiñ shuh ba ki don dor.
Haba kren halor ka jingsngap mynti ka sorkar wat hadien san sien ki jingïakhih kiba ka la pynlong u la ong ba kane ka jingleh ka sorkar ka pyni ba kim shym la kheiñ kor ïa ka pule puthi bad ki skul hi baroh kawei.
