Shillong, Jylliew 15 : U MLA ka Mairang uba long ruh u Lamphang ka ïingdor bar thawaiñ ka Jylla, u bah Metbah Lyngdoh mynta ka sngi u la pyntip baka ophis jong u kan sam biang ïa ka khusnam sha ki samla pule kiba na Mairang konstitwensi kiba la pas bha mynta u snem.
Katkum ka jingïathuh jong u MLA ka Mairang u la ong, kine ki khusnam kin long na bynta kito ki samla kiba pas ha ka Secondary School Leaving Certificate (SSLC), Higher Secondary School Leaving Certificate (HSSLC) jong ki board naduh ka MBoSE, CBSE bad ICSE.
Na ka bynta ka HSSLC yn sam sha baroh ki jingpule, ka arts, science bad commerce.
Ki ban ioh ïa ka khusnam kin long mar 10 tylli ki khusnam ha ka SSLC bad HSSLC.
Ki kot jingdonkam ki ban pynpoi ki kynthup ïa ki Marksheet, Birth Certificate, Schedule Tribe, EPIC kmie bad kpa, dur ar tylli bad number phone.
Ka tarik ba khatduh ban pynpoi ïa ki kot baroh kan long hapoh ka 25 tarik Jylliew da kaba leit buh ha ka ophis u Lamphang ha Khyndailad, Shillong, ka iingsah u MLA ha Laitumkhrah bad ha ka ophis treikam jong u MLA kaba don ha Mission, Mairang lane da kaba phone ha kine ki mobile nombor 98630-55757, 97740-88857.
