Nongpoh, Jymmang 04: Da ka jingangnud bad ka jingthmu ban dang kyntiew ïa ki kam ri Dohkha hapoh ka jylla na ka bynta ki nongri Dohkha hapoh ka jylla, ka Hynniewtrep Live Fish & Fish Seeds Suppliers Association ka la rai ban pynlong ka jingai jinghikai ba kyrpang ïa ki nongri Dohkha bad kumjuh ruh shaphang ka rep ka riang na ka bynta ki nongrep hapoh ka Bri u Hynniewtrep.
Na ka liang kane ka Asso ciation ka la rai ban pynlong ïa kane ka jingai jinghikai ha ka 7 tarik u Jymmang, 2022 ha Ingdorbar ka Shnong Iewmaw long kaba sdang naduh ka por 10 baje mynstep.
Ka Association ka pyntip ruh ba ha katei ka sngi u Professor Wanshaphrang Tiewsoh, MFSc, NET na St. Anthony’s College. U Samla Aristone Manbha Ryndongsngi, president ka Assocaition bad u Bah Kitlang D. Kharkongngor, uba dei u Officer ba la shongthaid ka tnad agriculture kin ai ka jingpynshai sha ki nongri dohkha halor ka kam ri dohkha bad kumjuh ruh shaphang ka rep ka riang.
