Nongpoh, Risaw 17: U Senior Superintendent of Police ka Ri-Bhoi hadien ka jingtalasi kali bad ki VDP hynnin ka miet haka shnong Quinine u la kyrpad ïa ki paidbah kiba ju sngewtynnad ban pyndonkam ïa ki social media, kum ka Facebook, Instagram bad kumta ter ter ba kin phah ïa ki jingai jingmut jong ki sha ki pulit ka Ri-Bhoi kumno ba ki pulit kin dang lah ban trei bad ban pynjanai ïa ka jingshakri sha ki paidbah.
Kum u heh pulit ka Ri-Bhoi u la kyrpad ruh ba ki jingai jingmut ne ki jingkynthoh ki dei ban long kiba don jingmut bad kiba tei ïa ka imlang ka sahlang, namar kum ki pulit ki shimkhia ïa ki jingai jingmut jong ki paidbah ban ïa treilang bad ban pynlong ïa kane ka district kaba itynnad bad ka jylla Meghalaya baroh kawei kum ka jaka kaba lait na ki kam sniew ka smeh bad ki paidbah ki lah ban ïaid ban ieng hapdeng ka jingkmen naduh ki khyllung khynnah khlem kano kano ka jingsyier.
