Ym tang kiba die madan, wat ki kali ruh ki pynthut ïa ka jingïaid lynti ha Khyndailad

By Mawphor Editor On Jul 8, 2025

Shillong, Naitung 07: Ka jingshah ban ïaid ki kali na Khyndailad kaba lah slem bha mynta ka la nang pynkhapngiah shuh shuh ïa ka lynti ïaid kjat ha kane ka thaiñ.
Ka jingpynkhapngiah ïa ka Khyndailad kam dei lehse tang da kiba shong die jingdie ha madan hynrei ka jingïaid ki kali ruh ka la long kawei na ki daw ba pynkhapngiah ïa kane ka lynti ïaid kjat.
Ha ka jinglap u nongthoh khubor ban shu kynnoh beit tang ïa kiba die madan ba ki long ka daw ban pynthut ïa ka ïaid lynti kiba paidbah ka long shisha kaba bakla namar kumba la ïohi ba ka jingïaid ki kali manla ka minit la ïohi ba ka la pynthut shisha ïa ki paidbah naba kim ïoh ïaid shuh da kaba suk ba saiñ namar ki hap ban kynriah kali ha manla ka minit bad kane ka la wanrah shisha ka jingeh ïa ki nongleit nongwan ki paidbah kiba pyndonkam ïa kane ka lynti ïaid kjat.
Ha ka jingshisha ka sorkar ka la dei ban pynbna ba ka Khyndailad kan dei ban long beit noh pura tang ka lynti kaba dei ban ïaid da ki paidbah ym kum ka surok kali kaba pyndonkam bad kaba lah ban ïaid lang bad paidbah bad kali naba kane ka long ka jingma ïa ki paidbah ba ïaid lynti.
Kane ka jingshah ban iaid ki kali na Khyndailad, khamtam lada ki ïaid sted, kan long ka jingma shisha ïa ki paidbah kiba ïaid lynti na kane ka lynti ïaid kjat, khamtam eh ïa kito kiba ïaid bad ïalam lang bad ki khynnah rit.
Ka jingïaid jong ki kali ha ka lynti ïaid kjat ba ju ïaid ki paidbah ha Khyndailad ym tang ba ka wanrah ka jingma ïa kiba ïaid ba ïeng, ne ka jingkhap ngiah ka lynti ïaid ki paidbah, hynrei ka la pynjulor ruh wat ïa ki tiles kiba la siang ban pynitynnad ha kane ka jaka.
Kumba la ïohi mynta bun na ki tiles kiba la siang ha kane ka lynti ïaid kjat ki la bun kiba lah julor bad mih lut shabar na ka daw kaba lah ban long na ka jingïaid jong ki kali manla ka sngi bad manla ka minit.
Kumta lah donkam ïa ka tnat Urban Affairs bad ka Shillong Municipal Board ba kin shim khia ïa kane ka kam da kaba peit da kawei ka lad ka lynti ban pynïaid ïa ki kali lada ki dang kwah ban pynneh ïa ka jingitynnad jong ka surok ne lynti ïaid kjat jong ka Khyndailad.