Ym tang ka Kolej sorkar, ka Ri Bhoi ka don hok ruh ban ioh wat ïa ka Medical College kum ka Aspirational District, ong u MLA ka Nongpoh

Nongpoh, Jylliew 11: Ka Ri Bhoi District ka la ïaid lynti mynta la lai phew tylli ki snem naduh ba ka la ioh la ka jong ka District kaba pura ha ka 4 tarik u Jylliew, 1992 bad kiba bun ki la buh jingkylli haduh mynta ka Ri Bhoi kam pat don tang kawei ruh ka Kolej Sorkar lait noh ki Kolej ba pynïaid da ki riew shimet ba ki samla pule ki ioh lad ban pyntbit ïa ki jingpule sha ki kyrdan ba kham shaneng.
Ka Ri Bhoi Dorbar dang ha ka 4 tarik u Jylliew 2022 ka la pynlong da ka jingrakhe ba kyrpang ïa kane ka jingdap 30 snem ka Ri Bhoi District ba ka la ioh la ka jong ka District ba pura ha Nongpoh bad shibun ki riew pawkhmat bad ki nongmihikhmat ki la wan ban shim bynta ban ïa kren halor ki jinglong jingman ka Ri Bhoi District.
Kiba bun ruh ki nongïalam naduh ki nongmihkhmat paidbah bad kynthup ruh ki riew rangbah, haba kren ha katei ka sngi ki la pynpaw shisha ka jingkmen ba ka Ri Bhoi District ka la ioh la ka jong ka District ba pura bad kane ka jingioh ïa ka District ba pura ruh ka dei ka jingdon bynta jong ki katto katne ki riew shemphang bad ki riew proh jabieng na Ri Bhoi ba kane ka jingdawa district ka la urlong bad ki katto katne ki riew rangbah ki kynthup ïa u Dr. D.D Lapang, u Fr. Sylvanus Sngi Lyngdoh, u Bah J.D Rymbai, u Bah Fleming Lapang, u Bah S. Kalwing bad kiwei kiwei.
Nadpeng ki nongai jingkren ha katei ka sngi, uwei na u nongmihkhmat paidbah u la kren ïa ki katto katne ki mat ki jura ba ngi dang hap ban ïa khun na ka bynta ka Ri Bhoi District bad une u dei u Bah Mayral Born Syiem, MLA ka Nongpoh.
Ki mat ba la kren da une u nongmihkhmat paidbah ka Nongpoh, u Bah Mayral Born Syiem u la pynsgnew ba ngi la ïaid lynti mynta la lai phew tylli ki snem naduh ba la ioh ïa la ka jong ka District bad kum ki paidbah ka Ri Bhoi ki la don hok ban ioh noh la kajong ka Kolej Sorkar bad lada ka sorkar jylla ka lah ban wan rah ïa ka Kolej sorkar kane kan long ka jingkyrkhu ïa kiba bun ki longing longsem baduk ba kyrduh ba kim donkam shuh ban phah pule ïa ki khun shajngai bad tang hapoh ka District ki khun jong ki ki la lah ban pule sha ki kyrdan ba kham shaneng,
Utei u nongmihkhmat paidbah u la pynpaw ruh ba ka Ri Bhoi District ym tang ba ka la don hok ban ioh ïa ka Kolej sorkar ban ailad ïa ki samla pule ba kin dang lah ban teng ïa ki jingpule kiba kham shajrong namar ka jingrit ka jingsiew bad ka Ri Bhoi District ka don ruh ka jingkyrmen ban ioh wat ïa ka Medical College kaba dei hadien ba kane ka District ka la shah jied kum kata ka Aspirational District ha kaba katkum ki kyndon ne ka thong jong ka Aspirational District ka don ruh ka bhah wat ban ioh ïa ka Medical College bad kane ka dei ha kajingstad ki nongïalam ka jylla, u la bynrap.