Ym tang ban rep hynrei dei tip ruh kumno ban sumar ïa ka khyndew, ong ka saïantis ïa ki nongrep

Nongstoiñ, Nailar, 10: Kum shi bynta ban pynshlur ïa ki nongrep, mynta ka sngi ka seng trei mon sngewbha kaba la tip kum ka Nongstoiñ Social Service Society, ka la pynlong ïa jingïalang paidbah ban ai jinghikai sha ki nongrep, ha kaba ïadei bad ka rukom rep kaba katkum kane ka juk kaba mynta, namar ym ban shu tip tang kumno ban thung ne rep, hynrei ki nongrep ki hap ruh ban tip kumno ban tyngkai ne sumar bha wat ïa ka khyndew, khnang ban long ka khyndew kaba seisoh.
Ïa katei ka jingïalang la pynlong ha ka hall jong ka Nongstoiñ Social Service Society Nongstoiñ West Khasi Hills District, ha kaba u bah H.K.Thabah (ADC), u la long kum u kongsan bad la synran lang ruh da ka kong Lakyntiew Warjri Senior Scientist Krishi Vigyan Kendra West Khasi Hills, u phadar Roland Lyngdoh President Nongstoiñ Social Service Society, u phadar James Anderson Syiemlieh Director ka Nongstoiñ Social Service Society bad kiwei kiwei ki riew rangbah jong ka thaiñ.
Kum ka dak jong ka jingplie paidbah, u kongsan u la ïoh ruh ban khap ïa u ribbon bad ban plie ruh ïa ka pyrda jong ka jingsdang ka jingai jinghikai. Ha kajuh ka por la ïoh ruh ban sam ïa ki syrnod sha ki nongrep kiba la kham paw bad kiba minot bha.
U kongsan haba ai jingkren u la ong, “Ki nongrep ka jylla kat haduh mynta, kim pat lah ban pyndap wat tang ïa la ka District ruh, hynrei la shu rep tang ban dap ïalade. Dei namar kane ka daw ba ki jingthung ne ki mrad kum ki masi ki syiar kiba dei ki bym khleh dawai ki die ha ka dor kaba rem”.
“Ka por ka lah dei ba ki nongrep kin sngewthuh kumno ban pynjur ne pynkhlaiñ shuh shuh ïa ki kam rep, namar lada ngi pyndonkam ïa ki jhur ki jhep ki bym shym la khleh dawai, kan myntoi ïa ka met bad ka koit ka khiah jong ngi. Ka jingber dawai ka ktah shibun ïa ka koit ka khiah bad ka ka long ka jingma ruh”, u la ong.
Na ka liang ka saïantis kong Lakyntiew pat ka la ong, “Ki nongrep ki hap ban tyngkai wat ïa ka khyndew, namar lada ka khyndew ka dap satang da ki dawai, kan don ka por ba ka khyndew kan ïap noh bad kam sboh shuh. Namar kata ka donkam ban sumar bad ban ïada, khnang ba ka khyndew kaba ki nongrep ki pyndonkam, kan long ka ban bteng ïa ka jingseisoh na ka por sha ka por”.
“Kawei na ki sboh kaba bha tam ïa ki nongrep ka dei ka eit masi, lait nangta kin wan sa ki eit jong kiwei kiwei pat ki mrad. Hynrei ki dawai khemikal ki long kiba ma, kumta ki nongrep ki hap ruh ban pynkhlaiñ ban ri jingri”, ka la ong.