Ym tang 3 sngi hynrei man ka sngi pynïoh um ïa ngi na ka JJM : kyrpad ki paidbah
Mawkyrwat, Nohprah 09 : Ki paidbah jong ki shnong ha Nongsynrieh lyngba u bah Rolan Nonglang uba dei u Myntri shnong Nongsynrieh ha ka jingwan jurip jong u Executive Engineer jong ka PHE Mawkyrwat Division, u Bah K. Nongbsaw ki la pynsngew ha u ïa ki jingeh ba wat la ki pipe um ki la poi haman la ki thliew ïing hynrei sngewsih ban ong ba ki paidbah kim ïoh ïa ka umbam umdih man ka sngi kumba long lem kiwei ki shnong hynrei ki ïoh tang 3 sien shi-taïew.
Namarkata, ka shnong ka la kyrpad ïa ka sorkar kumjuh ruh ïa u Executive Engineer ban pynïoh skhim um kyrpang sa kawei ha kane ka shnong namar kumba long mynta na ka tyllong um la ring um na kawei ka pump kaba don ha shnong Jashiar ha kaba na kane ka jaka ring um la hap ban sam umbam ruh ïa kiwei ki shnong kum ka Pynden-Mawthawïang, Mawthawïang-Nongtraw bad Pharmahïong.
Kumta ha kaba ïa dei bad kane ka jingpynsngew, u bah K. Nongbsaw, Executive Engineer ka PHE Mawkyrwat Division u la ïathuh ba na ka liang ka tnat PHE ka khlem shongthait ka la dep ban peit bniah ne survey ban pynïoh sa kawei ka tyllong um ha Rohdam hajan ka shnong Mawthong ha kaba la dep ruh ban shna ïa ka Details Project Report ne DPR bad phah sha ka sorkar bad da kane u kyrmen ruh ba lada ka sorkar kan ïoh ban mang pisa ïa kane ka skhim, baroh ki longïing ha Shnong Nongsynrieh kin sa ïoh ïa ka umbam umdih kaba man ka sngi.
Lah ban kdew ba kane ka jingleit jurip jong ka tnad PHE Mawkyrwat Division hapoh ka jingïalam jong u bah K. Nongbsaw, Executive Engineer ka PHE Mawkyrwat Division ka long ïa ka skhim la pyntrei lyngba ka Retro Fitting Scheme jong ka Jal Jeevan Mission kaba la dep pyntrei naduh ka snem 2023 bad ha kane ka jingjurip la lap ba baroh ki longïing kiba don kumba 168 tylli ki la ïoh ïa ka umbam umdih ha man la ki thliew ïing kumjuh ruh ki skul, ki Aganwadi Centre, ka Sub- Centre bad jaka leit Shabar paidbah (Public Toilet).
Kiba donlang ha kane ka sngi ki long naduh u bah I. Kharbundon uba dei u SDO PHE Mawkyrwat Division, u bah E. Khongthiang, SDO (TC), u bah Steven Wahlang, District Project Manager, JJM, South West Khasi Hills District lem bad ki nongïalam shnong bad ki nongkitkam ka VWSC.