Shillong, Nohprah 09 : U Chief Executive Member ka KHADC, Bah Pynïaid Sing Syiem u la pynpaw ba um sngew ïahap satia ïa ka jingpynbor jong ka Congress ïa ki arngut ki MDC jong ka ba ki dei ban weng noh na ka Executive Committee kaba ïalam da ka NPP, tang namar ba la jan ka elekshon.
Haba kren bad ki lad pathai khubor, u Bah Pynïaid u la ong ba ka elekshon ka ïaid la ka elekshon kumta kam ïahap ban kyrsum lang ïa ka rukom treikam ha ka Council bad ki kam party.
“Kum ki nongïalam ha ka Council, ngi khlem mih ban leit trei na ka bynta kano kano ka party hynrei na ka bynta ki paidbah. Kumta, ka jingïakren shaphang ka party ka dei beit tang ha ka por elekshon khnang ba ki paidbah kin tip u Bah Pynïaid u dei na kano ka shap bad u Bah Pynshngaiñ u dei na kano ka shap. Tangba shwa kata, baroh san snem ka jingtreikam kadei na bynta u paidbah ym ha ka kyrteng ka party,” ong u Bah Pynïaid.
Watla na ka liang jong u, um kwah satia ban kynthoh halor katei ka jingpynbor jong ka Congress ba ki MDC jong ka ki dei ban weng noh na ka Executive Committee, hynrei u CEM u la ong ba um sngew ïahap satia ïa kane ka sienjam kaba ki shim.
“Nga shu sngewkhia halor kane ka khubor namar kumba phi la ïohi lut baroh, da kaba ngi ïatrei lang ryngkat ryngkat, ngi la lah ban trei shibun bha na ka bynta ka jingmyntoi ki paidbah khamtam ha ka synshar khadar,” u la bynrap biang.
Shuh shuh u la ïai ban biang da kaba ong, “Ka jingïadei jong u MLA/MDC bad ki seng saiñpyrthei ka dei tang ha ka por elekshon namar ka long tang ban ithuh ïa ka shap khnang ba ki paidbah kin ithuh kumno bad ïano ban jied”.
Ha kawei ka liang, u la ong ba lada kitei ki MDC ka Congress ki neh lane ki mih noh um don satia ban ong ei ei lane ban pynbor ïa ki.
Lah ban kdew hangne, ba ka Congress ka don arngut ki MDC, kata u Bah Pynshngaiñ N Syiem MDC ka Mawkhar ba bat ruh ïa ka shuki Deputy CEM bad ruh u MLA\MDC ka Mylliem, Bah Ronnie V Lyngdoh, kiba trei lang ha ka Executive Committee ba ïalam da ka NPP.
