Ym slem shuh ban pahuh sniang bam doh lada baroh ki shim kum ka lad kamai – Bah AL Hek
Dang bteng ka sorkar ban ai skim ïa ki paidbah
Shillong, Ïaiong 14 : U Myntri ka tnad Animal Husbandary & Veterinary ka sorkar jylla, Bah AL Hek ha ka sngi Nyngkong u la ong ba ka sorkar haduh mynta ka dang ïai bteng ban ai ïa ka skim ri sniang sha ki paidbah ka jylla kiba kwah ban ri ïa ki sniang bam doh.
Haba kren bad ki lad pathai khubor, u Myntri ula ïathuh ba ki nongïoh ïa ka skim ri sniang ki kynthup naduh kito kiba ïoh ïa ka Meghalaya Piggery Mission bad ruh na ka National Livestock Mission jong ka sorkar pdeng.
“Man u snem ngi ju ai ïa kine ki skim ri sniang sha ki paidbah bad la kumno kumno da ki spah ngut ki nongïoh jingmyntoi ki ju ïoh ïa kine ki skim,” u la ong da kaba bynrap ba bun na kitei ki nongïoh jingmyntoi ki la pynpaw ïa ka jingsngewnguh ïa ka sorkar.
Related Posts
Haba jubab halor ka jingkylli, u Bah AL Hek u la ong ruh ba haduh mynta hi ka jylla ka dang hap ban shaniah na shabar jylla ban pyndap ïa ki sniang bam doh hangne. “Hynrei ngi kyrmen skhem ba ha kine ki khyndiat snem ngin sa lah ba pyndap noh na la ka jong ka jylla, kata ruh tang lada ki paidbah ki shim ïa kane ka kam ri sniang kum ka kam kaba ai kamai,” u la ong.
Da kaba pynshai pat ba ka tnad ri jingri kam lah ban ai skim ri sniang lut sha ki hajar hajar ngut kiba aplai ha ka shisien ai, u Myntri u la ïathuh pat ki pyrshang beit man u snem ban ai khyndiat khyndiat bad ka shong pat ha kito kiba ïoh ban pynheh shuh shuh ïa ka kam ri sniang na kaba ai ka sorkar.
“Ym baroh kiba aplai kin ïoh ïa kane ka skim hynrei ka shong pat katkum ka jinglong ka jaka, hadien ba ki ophisar ka tnad ki la dep ban wan jurip,” la bynrap biang u Myntri.
Shuh shuh u ong ruh ba ka doh sniang kadei kawei na ki jait doh kaba baroh ki paidbah ki bam lut kumta ka jingdawa ruh ka jur bha bad dei na kane ka daw ba la hap ban wanrah na shabar jylla katba ka jylla nalade kam pat lah ban pyndap ïa ka jingdonkam.