Shillong, Nailar 02: Ki nonghikai contractual hapoh ka shatri Meghalaya Government Lower Primary School Contractual Teachers Association (MGLPCTA) kiba la pynlong ïa ka jingïakhih da kaba shong sahmiet ha khmat ka ophis MBOSE naduh mynnin ka sngi ki la ïathuh ba na ka liang ka sorkar kam shah satia ïa ki ba kin sher dara ha ka jaka ba ki pynlong jingïakhih.
Ha ka jingïakren bad u Mawphor na kine ki nonghikai ki la ïathuh ba kane ka jingbym shah ka bor synshar District ban sher dara ne ban tap tirpal kin ym ioh tang ka jaka rieh tngen lada kumno kumno ka don ka jinghap slap.
“Ngi long kum ki mrad khlem jaka rieh, tangba long katba long ngin ïakun beit ban ioh ïa ka hok jong ngi” ki la pynpaw
“Ka DC ha ka jingïakynduh ka la ong ba ka la ai jingbit ba ngin pynlong jingïakhih hangne kaba kumno pat ka jingbit kaba ki ai namar tang ban sher dara ruh kim shah” buh jingkylli u Babu Birbor.
Shuh shuh u la ïathuh ruh ba ka jaka kaba ka la ai na bynta ba kin jingïakhih ka long kaba jynjar haduh katta katta khamtam namar ka jingbym don paiñkhana.
