Shillong, Naitung 27: Ka seng ki nongniah kali kamai East Khasi Hills Local Taxi Welfare Association mynta ka sngi ki la pynpaw ïa ka jingpyrshah lada hap ban phong uniform noh ki nongñiah taxi.
Kane ka dei ka jingkren kaba u DGP dang shen u la pynsngew ha ka sngi leit jngoh ïa ka madanryting haba ki katto katne ngut ki nongshong shnong katei ka thaiñ ki la wan ud ha khmat jong u ban tuklar lem ïa ka rukom pyniaid kali.
U Chief Organising Secretary ka seng u Bah Mangkara Shylla haba kren sha ki lad pathai khubor u la ong ba lada ka mih ka hukum ban pynphong uniform ïa ki nongñiah taxi ki nym treh satia da kaba u la ong ba dei ban pynphong uniform lang ïa ki nongtrei sorkar baroh lada ka don kum kata ka aiñ.
U la ong “Wat u nongtrei sorkar ruh kim pat phong uniform balei yn pynphong uniform tang ïa ngi.” Shuh shuh ki ong ba lada ka sorkar ka phah phong uniform kan buh jingeh bha namar kiba bun ki dei tang ki nongbylla.
“Lada ka sorkar ka pynmih kum kata ka hukum ngin thied khaw ne thied uniform” u la bynrap.
Haba kylli lada ka sorkar kan tip hi ïa ka bai uniform kin pdiang ne em na ka liang jong u u la ong u la ba wat lada ka sorkar ka siew ïa ka bai uniform ruh hynrei ki nym pdiang satia katba ki nongtrei sorkar kim pat phong uniform lang.
Ha kaba iadei bad ka jingud ki paidbah ïa ka bai shong kali bad ka jingkit ïa ïa ki nongleit nongwan palat ïa ki kyndon ba la buh ba ha kawei ka taxi yn lah ban kit tang 4 ngut a ka liang jong ka seng ka la kam ba ma ki hi ki dang bud thik pa thik katkum ka jingbthah na ka ophis jong u DTO ban kit briew tang saw ngut kaba long lai ngut shadien bad iwei shakhmat.
U la kyntu ia ki paidbah ba lada don ki nongshim kabu, kidei ban shon dur ïa u number plate bad phah sha ka seng lane sha ka ophis u DTO ba kin leh ïa kaba donkam.
