Ym paw ka shnong Baikam ha ka MoU ïapynbeit pud ka Meghalaya bad Assam

Shillong, Nailur, 29: Ki nongïalam shnong jong ka shnong Baikam ka shnong kaba don tang hapoh 40 iing eiei kaba don ha khappud jong ka East Jaiñtia Hills District bad ka Jylla Assam kam shym la shah kynthup satia ha ka jingïapynbeit pud hapdeng ka Jylla Meghalaya bad ka Jylla Assam ha ka wat kaba nyngkong hadien ba ka Sorkar Meghalaya bad ka Sorkar Assam ki ladep ïasoi ïa ka Memorandum of Understanding (MoU).
Ha kaba ïadei bad kane, ki nongïalam jong kane ka shnong ryngkat lang bad ki nongïalam jong ka Hynñiewtrep Youths Council-Central Body ha ka sngi Palei ki la leit pynsngew hakhmat u Myntri ka tnat Kam Pohing ka Sorkar Jylla u Bah Lahkmen Rymbui uba dei ruh u dkhot jong ka Regional Committee na ka bynta ka Jaiñtia Hills ba un shimkhia da kaba pynsngew sha ki tyndong skhor jong u Myntri Rangbah ka Jylla u Conrad Kongkal Sangma ba un leh eiei halor kane.
“Ha ka jingleit jurip jong ngi, baroh ki nongshong shnong jong ka shnong Baikam ki da kwah eh ban shah pynhap sha ka Jylla Meghalaya. Hynrei namarba kim shym la ïoh jingtip mynba ki dkhot jong ka Regional Committtee ki leit sorjamin ïa ki jaka sha Ratacherra Sector kumta ki nongshong shnong kim shym la tip satia shaphang ka jingdon ka jingïalang ba la khot da ka Regional Committee,” la ong u General Secretary ka HYC u Bah Roykupar Synrem ha ka jingïakren bad ki lad pathai khubor.
“Hynrei dei tad ynda ladep ïasoi ïa ka MoU ki sa ïoh jingtip ynda haba ka la don ka jingleit thew ïa u pud u sam da ki ophisar na ka jylla Meghalaya bad ka Jylla Assam,” u la ong.
“Ka Sorkar Meghalaya ka dei ban kynthup ïa ka shnong Baikam hapoh ka Meghalaya namarba lada peit katkum ki san tylli ki kyndon ka la buh, ka jingdon jong ki briew kiba sah ha kane ka shnong ki dei baroh ki Khasi-Pnar, kaba ar, lada bishar kum ka jingïajan na kawei ka shnong sha kawei pat lada peit katkum ka MoU ka Ratacherra, ka Malidor bad ka Border Umpyrdit ki la wan noh sha ka Meghalaya hynrei ka shnong Baikam kaba don hajan ka shnong Ratacherra kam shym la shah kynthup,” la ong shuh shuh u Bah Synrem.
U la ïathuh ba u Myntri ka tnat Kam Pohing u la ong ba un sa shimkhia ïa kane ka kam bad ban ïaleh katba lah ban ïarap ba ka shnong Baikam kaba la shong da ki Khasi-Pnar kan shah pynngat sha ka Jylla Meghalaya.
“Ngin sa nang ïai buddien ïa kane ka kam bad ngin sa ïakynduh ruh ïa u Chairman jong Regional Committee na ka bynta ka Jaiñtia Hills u Bah Sniawbhalang Dhar bad ngin sa ai ruh da ka jingthoh ha u Myntri Rangbah bad ha u Symbud Myntri.
“Namarba kine ki briew ki dei ki Khasi-Pnar paka, ka sorkar Meghalaya ka dei ban kdup ïa ki bad ban kynthup ïa ki sha ka jylla Meghalaya. Kam dei kaba suk ïa ki ban leit sha ka Jylla Assam, Cachar District namarba ka ktien ka thylliej, ka rukom im, ka bam ka dih, ka riti ka dustur ka ïapher haduh katta katta,” u la ong.
Ka Secretary jong ka shnong Baikam ka Kong Rihun Suchiang ka la ong, “ki nongshong shnong jong ngi kim don jingip shaphang kata (sorjamin ïapynbeit pud). Dei tad ynda la don ka jingthew jaka na Meghalaya bad Assam ngi sa ïoh jingtip ba ladep ïapynbeit pud bad soi ïa ka MoU.
“Kum ki Khasi-Pnar ngi kwah ban don bad ka Jylla Meghalaya hynrei ban shah khynñiat sha Assam ngi sngew nongwei namarba ka trei ka ktah, ki jaka ki puta jong ngi ka dang hap lang bad ka Ratacherra,” ka la ong.
“Ka Niam ka rukom, ka ktien ka thylliej, ka riam ka beit ka dei kajuh bad ban im sha ri nongwei ngim kwah bad ngi kyrpad ïa ka Sorkar ba kan kdup ïa ngi sha Meghalaya khnang ba ngin ïoh im suk im saiñ,” la ong kane ka Secretary jong ka shnong Baikan.