Shillong, Jylliew, 12: U nongshong shnong jong ka shnong Laitumkhrah, Shillong u Bah Wankitbok Pohshna u la kynnoh ba ki bor bahalor kim shym la patiaw peit halor ka jingtei iing beain ha jaka jong ka Municipal kaba don ha Goralane, Laitumkhrah, Shillong.
“Wat hapdeng ki jingujor bad pyntip ba la bunsien sha ki bor badei peit, ki briew kiba sah ha jaka jong ka Municipal ha Goralane, Laitumkhrah ki dang ïai bteng ban shna ïa ki ing be-aiñ bad mynta la nang ïohi ba la nang mih shuh shuh ki jingtei be-aiñ da kaba pynkheiñ syndon ïa ki kyndon aiñ,” ong u Bah Pohshna ha u kyrwoh.
Haba pynpaw ba u la sei madan ïa kane ka ishu naduh u snem ba ladep, u Bah Pohshna u la ong ba ki bor badei peit ki la leh kyllut ïa baroh ki jingmudui bad ‘ka jingshna iing be-aiñ ka dang ïai bteng haduh kine ki sngi khlem da burom shuh wat ïa ki kyndon thaw iing (building bye laws) katkum ba la kdew da ka tnat Pynroi Sor.’
U la pyntip ba ïa ki notis la dep sam da u Chief Executive Officer (CEO) jong ka Shillong Municipal Board (SMB) sha kito kiba shna iing be-aiñ ha ka jaka jong ka Municipal ha ka 1 tarik, Rymphang, 2021.
“Hynrei haduh mynta kam shym la don satia ka jingpynshitom bad ïa ki ing mala ba la shna khlem da ïoh jingbit na ka Ophis jon gka MUDA mynta ki la ieng kynshreng bad la sah da ki briew ïa kiba ym lah satia ban tip naei ki wan,” u la kynnoh.
Shuh shuh u Bah Pohshna u la ïathuh ba ha u Rymphang, mynta u snem la phah ïa ka ujor sha ka Deputy Commissioner, East Khasi Hills halor ka jingtheh ñiut pathar ha ka wahduid Thangsniang kaba dei ka shnat wah jong ka wah Umkhrah hynrei, ‘haduh ba la thoh ïa kane ka khubor kam pat don satia kano kano ka jingtehlakam ïa ka jingbret jaboh pathar na ka jaka jong ka Municipal sha kane ka wahduid kat haduh ba ka la nang kynton jaboh shuh shuh ïa ka Wah Umkhrah.
U la ong ba la lap ruh ba ka jingmih ki iingrit hapoh kane ka jaka jong ka Municipal la kynnoh ba ki dei kiba la aiwai pateng bad kiba sah ha kine ki ing ba la shna be-aiñ ki la shna ruh ïa ki jaka pynieng kali ha surok ban leit sha Umplieng kat haduh ba ka la wanrah ïa ka jingdheng kali kaba jur ïa ki nongleit nongwan bad ïa ki khynnah skul bad ïa ki nongleit trei ophis.
“Ka jingbym leh eiei jong ki bor badei peit ka la long kum ka jingailad ban pynkha roi ïa ki kam runar ruser kum ka jingkhaii drok bad ha ki jaka ba marjan ka tuh ka thiem ka shyrkhei namarba ïa kito kiba sah ha jaka jong ka Municipal ym ju tip satia lait noh tang ïa ki nongtrei bad ïa ki longing kiba trei ha Shillong Municipal Board,” u la ong.
U Bah Pohshna u la ong ba ki bor synshar district bad ka SMB ki dei ban ïatreilang na ka bynta khanglad ïa ki kam be-aiñ ha jaka jong ka Municipal ha Laitumkhrah khnang ba kan ym long shuh sa kaei pat ka Them Mawlong lada dang ïai pynslem ban leh eiei.
