Ym pat shym la don kano kano ka mang tyngka ban shna ïa ka jingkieng ha khappud EJH

Khliehriat, Nailar 22 : Ki paidbah kiba sah ha ki thaiñ khappud kiba dei ban ïaid lyngba na ka jingkieng na Shymplong, ki ïakynduh jingeh haduh katta katta ha ka leit ka wan, ka kit ka bah, naduh ba ki bor ka mariang ki la pynjulor lut ploiñ ïa katei ka jingkieng ïaid kali kaba na ka daw ka jing jur palat u slap kaba la jia naduh ka 17 tarik u ïaïong 2022.
Ki thymmei khubor ki ïathuh ba ka jinglut jingsep baroh ha kaba maramot ïa ka jingkieng ha Shymplong kan kot haduh T1.9 klur tyngka, hynrei sngew phylla ba ïa kane ka mang tyngka (estimate) kat haduh mynta ka dang sahkut sah ha kti jong u Chief Engineer ka tnat PWD ha kaba ha ka jingshisha ka la dei ban ïaid ter ter sha ka tnat Planning bad sha ki wei kiwei ki tnat, hynrei wat hapdeng ka jingbym don ka mang tyngka ka tnat PWD Khliehriat ka la shim khia bad da ka jingiarap u kontraktor ïa katei ka jingkieng mynta la lah ban pyntrei.
Ha kaba ïakren bad u Mawphor, u Executive Engineer ka tnat P.W.D Khliehriat, u bah M.Kharnaior, u la kubur ba ka jingpyntrei ïa katei ka jingkieng ha Shymplong ka suki bad ong ruh ba don ki por ba ka thut ka jingtrei ruh na ka daw ka jinghap slap “Kiba bun ki bynta kiba heh te mynta la lah ban pyndep, ki sah sa tang katto katne ki bynta kiba rit bad ngi dang ap ruh ïa ki nar kiba yn wan kit bad wan pundai na Kolkata, kiba donkam ban pyndait ha ka jingkieng bad kam shim por shuh hi ban pyndep ïa ka jingtrei” ong u bah M.Kharnaior bad ïathuh ruh ba na ka liang ka tnat mynta ka dang ïaleh shitom ban wad ki lad ki lynti ban ïoh ïa ka mang tyngka (sanction) na ka bynta katei ka jingkieng, namar ka tnat ka la shu kyrpad ïa u kontraktor ba un nang pyntrei, ha kaba na ka liang u kontraktor ruh u la pynlut haduh kumba T50,0000 (san phew lak tyngka) ha kaba thied ïa ki tiar ban shna ïa katei ka jingkieng.
Na ka liang u Waheh Shnong jong ka shnong Shymplong, u bah Apstolin Syih, u la iathuh ba ka jingpyntrei ïa katei ka jingkieng ka dang ïaid ha kaba don ki por ba ka kam ka stet don ki por ba ka kam ka suki “Ngi kum ki paidbah ka thaiñ ngi kwah ba ka sorkar kan shim khia ïa kane ka kam ban kham pynstet ïa ka jingpyntrei, ngi kyntu ruh ïa kiba pyntrei ba kin kham pynbun ïa ki nongtrei khnang ba ka kam kan kloi ba kan nym buh jingeh than ïa ki paidbah ha ka leit ka wan, ha ka kit ka bah khamtam ha pang ka shitom namar naduh ban julor katei ka jingkieng ki kali kim lah shuh ban poi sha shnong” pynpaw u Waheh Shnong Shymplong.
Kum ban shu phai dien, katei ka jingkieng ( RCC Bridge No 54/1) kaba don ha Shymplong, myn ha ka 16 tarik u iaiong ka la dkhut ar liang bad ka um kaba lat-lat ka la rong noh ploiñ ïa ka jingkieng, ka jingdkhut noh kane ka jingkieng kala buh jingeh haduh katta katta ïa ki paidbah kiba sah ha ki thaiñ ba khappud bad ka ri Bangladesh kum ka shnong Shymplong, Huroi, Hingaria, Lejri, Lahaleiñ bad kiwei kiwei ki shnong ba khappud kiba ju iaid lyngba na kane ka jingkieng.