Shillong, Lber 1 : Ka Trinamool Congress (TMC) kat haduh mynta kam pat rai la kan pynïakhun kyrtong ne em ha ka bye election MP Lok Sabha na kane ka Shillong Parliamentary Constitency hadien ka jingkhlad noh jong u MP u Dr Ricky AJ Syngkon kaba la jia ha ka 19 tarik Rymphang, ong u President ka Party u bah Charles Pyngrope.
“ Ka TMC hi kam pat rai la kan pynïakhun ne pynïeng kyrtong ne em ha kane ka bye election MP Lok Sabha namar ha ka election ba la dep ruh ka party ka khlem pynïeng kyrtong satia” ong u bah Charles.
Haba la kylli hato kum ka party kan pynïeng kyrtong ha kane ka kynti u la ïathuh ba halor kane kin dang ïakren lang kum ka party tangba u ong ka party ka lah ban ym pynïakhun ruh namar ha ka election ba la dep ruh ka khlem pynïeng kyrtong.
Halor ka jingrai pat ban kyrshan ïa kano kano ka party ne u kyrtong u la ong ïa kane ruh ym pat iakren sait.
U la pynpaw ruh ba ka TMC kam pat ïoh ka jingkyrshan na ki paidbah ha kane ka ri lum Khasi bad Jaintia namar kumnba long mynta u dei tang ma u u MLA jongka party.
