Ym pat rai ka Sorkar hangno yn tei ïa ka Central Jail, ong u Dy. CM

Shillong, Nohprah 21 : U Symbud Myntri Rangbah ka Jylla ba dei peit ïa ka tnad Kampohiing (Prison), Bah Sniawbhalang Dhar u la ong ba ka sorkar jylla haduh mynta kam pat rai ïa ka jaka hangno ban tei ïa ka Central Jail.
“Ngi dang wad ïa ka jaka ban tei ïa ka Central Jail. Kumta tang shu la pyntikna ïa ka jaka bad tei ïa ka Jail thymmai, ngin sa pynkynriah noh ïa kane kaba mynta (Shillong District Jail na ka nongbah),” ong u Symbud Myntri Rangbah haba kren bad ki lad pathai khubor.
Lah ban kdew hangne ba ïa ka Central Jail la thmu ban tei ha New Shillong Township. Wat ïa ka soskular la dep ban ïasoi hapdeng ka tnad Home (Jail) Department bad ka tnad Urban Affairs na bynta ban pynkynriah noh ïa ka Shillong District Jail sha New Shillong Township.
“Hynrei, ngi sngew ba ngim pat lah ban pynkynrïah noh ïa kane ka jail ba mynta sha New Shillong Township hynrei ban wad shwa ïa ka jaka, kaba lehse kham pajih na ka nongbah,” bynrap shuh shuh u Symbud Myntri Rangbah.