Nongpoh, K’lyngkot 11: Ki 2 tylli ki shnong ha ka thaiñ Killing ba kynthup ïa ka shnong Jorbil Killing bad ka shnong Umlangpur ba hap ha Umling C&RD Block, ha kine ki sngi ba la leit noh ki la hap ban mad ïa ka jingkyrduh um umbam kyrduh umdih, kaba dei na ka daw ba ki runar kiba ym lah ban tip ki la leit ban tuh haduh 27 tylli ki Pipe Um jong ka skhim JJM ba pynpoi um sha kine ki ar tylli ki shnong.
Kum ban pynkynmaw, kane ka jingjia ka la jia dang shen ha kitei ki 2 tylli ki shnong, ba ki runar khlem da don shuh ka mynsiem ïa tip lem ki la nud ban tuh wat ïa ki pipe um ba pynpoi um sha kitei ki 2 tylli ki shnong bad ïa kane la lap ruh da ki bor shnong ha ka jingleit jurip ba ki runar ki la pyndkut ïa ki pipe bad rong tuh haduh ba kitei ki 2 tylli ki shnong ki la hap ban mad ïa ka jingkyrduh umbam umdih.
Halor kane ka jingshah tuh kitei ki pipe um ba la kot haduh 27 tylli, ki bor shnong jong kitei ki 2 tylli ki shnong ki la dep ruh ban ujor da ka ejehar, hadien ba la dep ban wan jurip lang da ka bor shnong bad ki Pulit.
Haba buddien halor kane ka jingshah tuh kitei ki pipe um, la ïathuh ba ki Pulit haduh mynta kim pat lap ksai satia ïa ki runar kiba don kti ha katei ka kam ban tuh ïa kitei ki pipe um.
Shuh shuh, la ïathuh ruh ba ki bor pulit ka Khanapara Police Station ki la ioh pdiang ïa ka ejehar ba la dep ban ujor da ka bor shnong bad ki la dep ruh ban register case pyrshah halor kane ka jingshah tuh ki pipe um, hynrei kumba long haduh mynta ki Pulit ki dang pynlong ïa ka jingbuddien na ka bynta ban ioh kem ïa ki runar kiba la don kti ban tuh ïa kitei ki pipe um na ka skhim JJM.
