Nongpoh, Naitung, 10: Wat hapdeng ka jingïaid bteng ban pynlong ïa ka jingtohkit halor ka jingshah thang jong ki 2 tylli ki Auto Rickshaw ha Mawtnum bad kumba long haduh mynta ki Pulit kim pat lap dien satia ïa ki runar kiba la leh ïa katei ka kam ban thang ïa ki 2 tylli ki Auto Rickshaw.
Kum ban pynkynmaw, ïa kitei ki 2 tylli ki Auto Rickshaw la thang dusmon da ki runar ha ka por shiteng synniang haduh ba kawei ka la kylla dpei bad kawei pat ka la shu julor malu mala. Kane ka jingjia ka la ha ka 8 tarik u Naitung 2025 ha kaba ki ar tylli ki Auto kawei kaba don ïa u number ML 10 D 0651 ba la long trai da u Bah Robertson Marwein bad kawei pat kaba don ïa u number Auto ML 10 D 3492 ba la long trai da u Bah Xavier Thabah, ba ki runar khlem don shuh ka mynsiem jingïatip lem ki la thang ïa kitei ki Auto Rickshaw kaba la wan rah ka jingduhnong kaba khraw ïa kitrei ki trai ka Auto Rickshaw.
Related Posts
Haba buddien halor kane ka jingjia, la ïoh jingtip ba haduh mynta ki Pulit ki dang pynlong ïa ka jingtohkit bad buddien halor kane ka jingjia bad wat la ki pulit ki la pynlong ïa kata ka jingtohkit bad kim shym pat la lap ksai pat ïa ki runar kiba don kti halor kane ka jingjia.
Shuh shuh, ki bor pulit ki la ong ba kin nym shongthaid bad kin dang bteng ïa ka jingtohkit haduh ban da lap ïa kito ki runar kiba la don kti ban thang ïa kitei ki Auto Rickshaw bad lada ïoh ban kem kitei ki runar kin nym lait satia na ki kyndon jong ka aiñ, ong ka tyllong khubor ba la ïoh lum na ki Pulit ka Ri Bhoi.