Ym pat lap ïa ki shikurim, ngam ki Pulit ïa ki khlaw ka Mawkdok, Laitduh, Lad Mawphlang

Shillong, Jylliew, 01: Ki Pulit ka Sohra Police Station ryngkat lang bad ka kynhun State Disaster Response Force (SDRF), Search and Rescue Team, Fire and Emergency Service bad ki bor synshar shnong bapher bapher ha ka sngi u Blei ki la ngam ïa ki khlaw ki btap, ki lum ki them bad sha ki riat ha ka thaiñ Mawkdok, Laitduh, Lad Mawphlang ban wad ïa ki shi kurim na Indoor, Madhya Pradesh, u Raja Raghuvanshi bad ka kurim jong u ka Sonam, kiba dang jah rngai haduh mynta ha ka jingleit kai “honeymoon” ha ka thaiñ Sohra, East Khasi Hills District .
Ka jingwad ïa ki shikurim ka la sdang naduh ki riat, ki lhuh jong ka thaiñ Mawkdok hynrei ym shym la lap dien satia bad nangne pat ki Pulit ryngkat lang bad u Officer Incharge jong ka Sohra PS ki la hiar pat sa sha ka thaiñ Laitduh.
Nalor kata, ka don ruh sa ka kynhun kaba wad ha ka thaiñ Lad Mawphlang hynrei ym shym la lap dien satia.
Ha ka jingwad ïa ki shikurim la synran lang da ki bahaïing hasem kiba la wan khnang naduh Indore ban pynlong ka jingwad ïa ki shikurim kiba dang jah rngai.
Ka jingwad ïa u Raja Raghuvanshi bad ka kurim jong u ka Sonam Raghuvanshi ka la kynjoh mynta sha ka 9 sngi naduh ba la lap ba ki la jah rngai naduh ka 24 tarik, Jymmang.
Ïa ka leit ka wan jong ki shikurim la ïohi khatduh haduh ka 23 tarik, Jymmang ba ki leit sha ka shnong Mawlakhiat da ka Scooty ba la shim wai. Nangne ki la hiar sha ka shnong Nongriat ban leit jngoh ïa ka jingkieng jri ha kaba ki la sahmiet ha kawei ka ïing basa. Ki Pulit ki la ïathuh ba ki shikurim ki la mih na ïing basa ha ka step kaba bud. Ïa ka Scooty kaba ki shu shim wai la lap ba la iehnoh ha ka 24 tarik Jymmang ha Sohra Rim bad la suba ba kine ki shikurim ki la jah rngai ha kane ka thaiñ naduh kane ka sngi bad nalor kata wat ka mobile phone jong kine ki ar ngut ruh ka la lip.
Ka jingwad jong ki Pulit ka la shah pynthud haduh katta katta na ka jingther jong u lapbah lapsan bad na ka jingdum jong u lyoh wat haba la pyndonkam ïa ki Drone bad ban pynsma da ki ksew.