Nongstoiñ, Risaw 21: Naduh dang step ki paidbah nongshong shnong jong ka shnong Mawkhlam-Nongpyndeng, da ka jingsngewkhia ka mynsiem ki la mih ryntih na la ïing ban leit wad ïa u Phyrnailin Nongrem, 43 snem ka karta u ba la jah rngai naduh ka 13 tarik mynta u bnai bad haduh mynta ym shym la wanphai ïing shuh.
Katkum ki kyndon shnong, baroh ki nongshong shnong samla shynrang kiba la kynjoh ïa ka 18 snem shaneng napoh ki 9 tylli ki Dong jong ka shnong, hapoh ka jingïalam jong u Myntri Bah Balentin Sohlang bad Bah AL Syiem, Secretary ryngkat la ka wait bad I Jasong, ki la rung sha ki khlaw ki btap bad ki lum ki wah jong ka shnong ban wad ïa une u khun shnong.
Ka jingleit wad ka long sha ki phang jong ka Wahriat ter ter shaduh Pengbah bad Mawsnah bad kumjuh ruh sha ki khlaw kiba don harud shnong bad kiwei de ki jaka, hynrei ym shym la lap dien satia haei u don.
U Bah A.L Syiem, Secretary ka shnong Mawkhlam-Nongpyndeng u la ïathuh ba ha kane ka jingleit wad antad jong ki nongshong shnong, ym shym la lap dien satia ïa utei u rangbah bad ym shym la don satia kino kino ki dak ki shin ba un don ha kitei ki bynta ba la leit wad.
U la ong ba ïa mynta ka shnong kan pynkut shwa katne ïa ka jingleit wad, hynrei u la kyntu pat ïa ki para nongshong shnong bad kumjuh ïa ki shnong ba marjan ba kin peitngor lem. Lada jia ba don kano kano ka dak kaba pyni ne lada jia ba ki don jingtip ei ei shaphang jong u, ba kin sngewbha ban pyntip mar mar sha ki nongïalam shnong.
Ki tyllong khubor ki ïathuh ruh ba watla u la jah naduh ka 13 tarik kaba dei ka sngi nyngkong, hynrei don pat ki nongïaid lynti kiba dang ïohi ïa u sa ha ka sngi ba bud hynrei ym don jingtip pat shaei u leit.
