Khliehriat, Jylliew 02: uwei u long kpa uba la tip kyrteng kum u bah Lakhon Phawa, 37 snem kyrta uba na ka shnong Cham Cham, East Jaiñtia Hills u la ngam jyllop ha ka wah Umthe kaba don hajan shnong Sakhaiñ, kane ka la jia naduh ka janmiet jong ka 30 tarik u jymmang ha ka por kumba 5 baje janmiet bad haduh mynta ym pat lap dien ïa ka met jong u.
Ki tyllong khubor ki iathuh ba u bah Lakhon Phawa u don ka rynieng kaba jrong 5.6 ft bad u dei uba poi shongkha ha ka shnong Mukhaialong East Jaiñtia Hills District, u la don lai ngut ki khun bad katei ka jingngam jyllop jong u ka dei ha ka por ba u dang mut ban leit phai noh sha ïing khun bad ha ka por ba u jam sha shiliang na katei ka wah u la kum btuit bad hap jyllop hapoh um.
Na ka liang ki bor shnong bad ki bor pulit ki la ialeh shitom ban wad ïa utei u rangbah uba la ngam jyllop ha um bad ki la pynlong ïa ka jingwad naduh Wah Umthe ter ter shaduh Wah Lukha (Sonapur) tangba ym pat lap dien eiei ruh, kane ka wah Umthe kaba na Sakhaiñ, elaka Sutnga ka dei ka wah kaba tuid sha wah Lukha sha Sonapur Narpuh.
Na ka liang ki bor shnong ki kyrpad ïa ki paidbah kiba ju iaid sha kitei ki jaka naduh wah Umthe shaduh wah Lukha ba kin sngewbha ban ai jingtip lem lada ki lap ne iohi ïa utei u rangbah uba ngam jyllop ha um ha kaba kin sngewbha ban pyntip da kaba phone ha u number 7005460209 / 9612107041.
