Ym pat ithikna ban lah weng ka sorkar ïa kiba die madan ha Khyndailad ha ka sngi baar

Shillong, Naitung 21: Ka Shillong Municipal Board (SMB) ha ka sngi Nyngkong, ka la bteng biang ban khynra ïa ki nongdie madan ha ka thaiñ Khyndailad da kaba phah pynthikna la ki la don ne em ïa ki syrnod lane ka Certificate of Vending (COV) kiba la ïoh na ophis Shillong Municipal Board.
Ha kane ka jingkhynra, la sakhi ba ki nongdie madan ki khlem pyni bor shuh bad ka jingbteng ban pynshishaï syrnod ka long kaba jai jai. Katkum ka jingïoh lum jingkheiñ katkum kito kiba la wan ban pyndep ïa ka jingpynrung kyrteng (register) ha ka ophis SMB, la don katto katne kiba khlem pat don syrnod ha kaba na ka liang ki nongtrei ka SMB ki la phah lum noh ïa ki tiar die jingdie jong ki bad bthah ruh ba kidei ban ban ïoh ïa ki syrnod kumba la ai jingmut da ka ophis.
Kumba la pynpaw da ki katto katne kiba shong die madan bad ki bym pat ïoh ïa ki syrnod ki la ong ba don shibun kiba la dep ban aplai COV na ka SMB hynrei ka jingai syrnod kam long kaba biang.
Lah ban kdew hangne ba u Myntri ka tnat Tourism ka sorkar jylla u Bah Paul Lyngdoh bad Bah Sniawbhalang Dhar u Myntri ba khmih ïa ka tnat Pynroi Sor (Urban Affairs) ki la pynthikna ba ka Sorkar ka lah beit ban weng ïa baroh ki nongdie madan na Khyndailad hapoh ka 22 tarik mynta u bnai da kaba ong ba kin buh ïa ki ha 2 tylli ki jaka ïa kiba ka Sorkar ka la dep ban pynshna kyrpang, kata ha jaka ïeng kali (parking lot) jong ka MUDA bad ha ka jaka ïeng kali kaba don pyrshah ka ophis SBI (main branch, Shillong).
Kumba ka long mynta bad kumba la ïohi, kane ka jingthmu ka sorkar ban weng ïa kiba die madan ha Khyndailad ha ka sngi Baar kam pat i long kam naba ka jingdon kiba die madan ka dang long hi kumba la jia ha ki por ba la dep.