Ym pat ioh jubab ki nongïalam Shnong lano ka sorkar kan pyndep noh ïa katei ka skulbah Polytechnic.

Nongpoh, Nailur 16: Ka jingangnud ki nongïalam ka Shnong na ka Raid Nonglyngdoh bad ka Raid Nongkhrah ban pyndep kham kloi noh ïa ka jingtei jong ka skulbah Polytechnic ha Nongkhrah kam pat shym la poi shaei shaei bad haduh mynta kim pat ioh kano kano ka jubab na kaei ka daw ba ka sorkar ka la pynsageh ïa katei ka jingtei ba la kynnoh ba u Contractor ba pyntrei ïa katei ka Polytechnic u la shu iehnoh jyndat khlem da pyndep kumba la mang tyngka ka sorkar.
Haba kren halor kane ka skul Polytechnic ki nongïalam Shnong na ka Raid Nongkhrah bad Raid Nonglyndoh dang shen ruh ki la wan ban jurip ïa katei ka jingtei katei ka skul Polytechnic ha Nongkhrah bad lap ruh ba u Contractor u la shu iehnoh jyndat bad pynsahkut khongreng ïa ka jingtrei khlem da pyndep kumba la mang bad thmu da ka sorkar jylla.
Kane ka jaka ba la tei ïa katei ka Polytechnic ka dei ruh ka jaka ba la ai sngewbha sha ka sorkar khlem da donkam ban siew dor bad ka jingangnud hi ki nongïalam ban ai ei ïa kane ka jaka ka long ban wan katei ka skulbah kaba ai jingmyntoi ym tang ïa ki khun samla katei ka dong bad ka thaiñ bad ka jingmyntoi kan long hi ruh na ka bynta jong baroh ki khun samla ka dong Ri Bhoi.
Ha kine ki khyndiat bnai ba la dep ki nongïalam kitei ki ar Raid bad ki Riew rangbah ki la wan ban jurip ïa katei ka jingtrei halor ka nongrim ba la pynsahteng da u Contractor khlem da pyndep kumba ka dei ban long bad kum ki nongïalam ki la pynpaw ruh ka jingsngewkhia namar na ka daw ka jingpynsahteng ïa katei ka jingtei ba khlem ki nongpeit nongkhmih ba bun ki riew shim kabu ki la pynlong pynban ïa katei ka jaka kum ka jaka ban leh ïa ki kam sinew.
Haba wad jingtip halor kane ka jingangnud kitei ki nongïalam kiba la kwah ba ka sorkar kan pyndep noh ïa katei ka jingtei ïa ka Polytechnic ban myntoi ki khun samla, uwei na u nongïalam Shnong u la pyntip ruh ba na ka liang ki nongïalam Shnong ym tang ba ki la wan ban jurip ïa katei ka jingpynsah teng ïa ka Polytechnic, hynrei na ka liang ki nongïalam Shnong ki la dep ruh ban ai da ka jingthoh sha u Deputy Commissioner ka Ri Bhoi ba un ïa kren sha ka sorkar, hynrei kumba long haduh mynta kim pat ioh satia kano kano ka jubab na ka sorkar ha kaba katei ka Polytechnic ka dang sahkut hi khongreng kumba ka long ha ka jingwan jurip ki nongïalam.
Namarkata, na ka liang ki nongïalam ki la buh ka jingkyrpad sha ka sorkar jylla ba kan shim khia noh ha kaba ïa dei ban pyndep noh ïa katei ka Polytechnic kaba la mang ban ai jinghikai ïa kiba bun ki khun samla ka dong bad ka thaiñ Ri Bhoi bad lada ka long hi tang ban pynsyrwa kai ïa ka pisa paidbah kam don jingmut lada ka sorkar kam lah ban pynurlong ïa kane ka jingthmu ba la tei ïa ka Polytechnic bad ka jingai jaka ei da ki shnong ruh kam myntoi bad ha kaba ïa dei bad ane ki la dep ruh ban byrngem ba lada ka sorkar hi kam lah ban pyntreikam kumba ka thmu katei ka jaka kan leit noh sha ka Shnong.