Shillong, Nailur 14: Ka Congress ha Meghalaya haduh mynta kam pat ïa kren satia la kan dang ïai bteng ne weng noh ka jingïatrei lang ha ka Executive Committee ba ïalam da ka National People’s Party (NPP) ha KHADC.
Ki tyllong khubor na ki nongïalam ka party ki ïathuh ba haduh mynta na ka liang ki nongïalam ka Congress kim pat ïa kren satia halor kane ka mat kaba la aiti ha u President ka party ban leh ïa kaba donkam.
Ban shu pynkynmaw, ka jingmih jong kane ka mat kadei hadien ba lai ngut ki MLA ka Congress ki la leit ban pynïasoh noh sha ka NPP kaba la poi haduh u pud ba ka party kaba don sawngut ki MLA kan don mynta sa tang uwei u MLA.
Ym tang katta, katei ka jingleit pynïasoh jong kitei ki lai ngut ki MLA ka la ktah lang ruh ha KHADC namar arngut na kitei ki MLA kata u Bah Charles Marngar ba dei u MLA ka Mawhati bad ruh u Bah Gabriel Wahlang MLA ka Nongstoiñ ki dei ruh ha kajuh ka por ki MDC.
Mynta ka Congress watla ka dang ïatreilang bad ka NPP ha KHADC hynrei ka don pat sa tang arngut ki MDC ba kynthup ïa u MDC ka Pynthor Bah PN Syiem bad u MLA/MDC ka Mylliem Bah RV Lyngdoh.
“Kumba long mynta ïa kane ka bynta ngim pat ïakren namar la aiti ha u President,” ong uwei na ki nongïalam Congress.
Ban shu phaidien, ki nongïalam ka Congress ha ka taïew ba khatduh jong u Nailar ki la ïathuh ba ka party ka dang ap ïa ka jingbthah jong ki nongïalam ba ha khlieh ka seng ne ka party high command la kin wengnoh ne-em ïa ka jingkyrshan na ka Executive Committee hapoh ka KHADC kaba la ïalam da ka National People’s Party (NPP).
Halor kane, dang shen wat na ka liang u President ka party, Bah Vincent Pala u la pynpaw ba ha ka jingïalang kaba la long ha u bnai ba la dep kiba bun na ki nongtrei jong ka party ki la pynpaw ïa ka jingdonkam jong ka party ba kadei ban wengnoh mardor ïa ka jingkyrshan ïa ka seng NPP kaba la ïalam ïa ka EC ha KHADC.
Katkum ka jingong jong u ha katei ka por ki hap ban pat ïoh ïa ka jingbthah na ki bor bahalor ka party na Delhi ha shwa ba shim ka rai namar ki dei ka National Party.
