Ym pat hun ka KHNAM ba pynduh ka Sorkar ïa ka Personal Interview tang ïa ka Group-D

Shillong, Naitung 10: Ka Khun Hynñiewtrep National Awakening Movement (KHNAM) ka la pynpaw ka jingbym pat da sngewhun bha halor ka jingpynsangeh ka sorkar ïa ki eksam personal interview na ka bynta ka jingthungkam ha Group-D ha ka jylla hadien ba ïa kane kajuh ka kam khlem da leh lang ïa Group B bad Group C. “Mynta ka sngi hadien ka jingïai dawa kaba khlem sangeh ban pynduhnoh ïa ka personal interview na ka bynta ka jingthung ïa ki kam sorkar ha ka jylla na ka bynta ka Gp B, Gp C bad Gp D, ka kynhun myntri ka la mynjur ban pynsangeh noh ïa ka jingpynlong ïa ka eksam personal interview tang na ka bynta ka Group D. Watla ngim pat da sngewhun bha ïa kane ka rai, ngi kwah ban pynpaw ïa ki jingsngewkhia bad ki jingbym sngewhun naba kane ka rai la shim tang na ka bynta ka Group D. Ngi la thoh bun tylli ki dorkhas sha ka sorkar jylla ban pynsangeh ïa ka eksam personal interview na ka bynta baroh ki 3 tylli ki kynhun,” ong ka kyrwoh na u Working President ka KHNAM u Bah Thomas Passah.
U la ong ba naduh u snem 2016, ka tnat Personnel & Training (DoPT), ka sorkar India ka la sdang ïa kane ka jingpynkylla kaba donkam ha kylleng ka Ri ban kynjoh ïa ka thong halor ka rukom treikam kaba khuid bad kaba shai kaba ïadei bad ka jingthungkam ha ki kam sorkar bad kumba 23 tylli ki jylla bad 8 tylli ki Union Territories ka ri India ki la ïasoh lang halor kane ka jingpynkylla thymmai, ha kaba ka jylla Meghalaya ka la long kawei na ki katto katne ki jylla ha ka ri kiba dang ïaibteng ban pynlong ki eksam personal interview.
“Ngi la thoh sha ka sorkar bad ngi la pynlong ruh bun tylli ki jingïakhih shong kyllaiñ myngngor ban kynjoh ïa ki jingdawa jong ngi. La kumno kumno, ngi la khmih lynti ba ka sorkar jylla kan pyrkhat ban pynduhnoh ïa ki eksam personal interview ruh na ka bynta ki kam hapoh ka Group C bad Group D,” ïathuh u Bah Passah.
U la kynnoh ruh ba ka sorkar jylla ka khlem bud ïa ki jingbthah jong ka sorkar pdeng ba la pynmih da ka tnat Personnel & Training (DoPT), ka Ministry of Personnel, Public Grievances & Pension, naba kine ki jingbthah ki khlem pyrkhing tang na ka bynta ka Group D.
“Ha kawei ka liang, ngin sa thoh sha ka sorkar jylla bad sha ka Ministry of Personnel halor kane ka phang, ban pynthikna ba ngin ïoh pura ïa ka khuid ka suba ha ka jingthungkam sorkar ha ka jylla Meghalaya,” bynrap shuh shuh u Bah Passah.