Ym pat don jingthmu ka sorkar ban pyndam ïa ka Projek Lynti Rel ha Meghalaya : Ma Sniawbha

Shillong, Risaw 10 : U Symbud Myntri Rangbah ka Jylla ba khmih ïa ka Tnad Transport u Ma Sniawbhalang Dhar ha ka sngi Ba-ar, ula ong ba ka Sorkar kam pat don jingthmu satia ban pynsangeh ne pyndam noh ïa ka projek ban pynpoi lynti rel sha Ri-lum Khasi-Jaintia.
Haba ïakren bad ki nongthoh khubor, u Ma Sniawbha ula ong “Ngim pat pynsangeh satia ïa kane ka jingthmu. Ngi dang shong bishar bniah ïa kane ka kam”.
Ka project lynti rel ha Ri-lum Khasi-Jaintia ka la mad ïa ki diengpyngkiang namar ka jingïeng pyrshah jong ki kynhun bapher bapher kynthup ki Sengbhalang. Kane ka project ka kynthup ïa ka lynti rel Tetelia-Byrnihat ba 22 Km bad ka Byrnihat-Shillong ba 108 Km. ïa ka lynti rel na Tetelia sha Byrnihat la sdang ban pyntrei ruh hynrei la hap ban pynsangeh na ka jingïeng pyrshah ki seng bhalang. Kane ka projek ka dei kaba la mang 496 klur tyngka.
Namar kane, ka Sorkar Jylla kala rai ban wad ïa ki lad ki lynti ha kaban pynïasoh lynti rel noh ha East Jaintia Hills District hynrei ïa kane ruh la pyrshah jur da ki paidbah.
U Ma Sniawbha u pyntip ba ka Sorkar haduh mynta kam pat shim rai satia la kan pynïaid beit shakhmat ïa ka project lynti rel.
“Kane ka wan jia namar ngi donkam ban ïakren shuwa bad baroh ki kynhun bapher bapher bad dei tang hadien kane ba ngin sa lah ban shim rai” ula ong.
“Ngin dang bteng ban ïakren bad ki (kynhun bapher bapher). Lada ki ong em, ngin sa bishar lada hap pynsangeh noh ne em” ula bynrap.
U la ong ba ka jingpyrshah halor kiba kum kine ki projek kin don beit hynrei ka dei ka kamram jongka sorkar ban pynlong da ki jingleit pynsngewthuh kylleng halor ka jingdonkam jongka lynti rel. Dei halor kane la pynlong ïaki prokam jingpynsngewthuh ha kylleng ki jaka da ki Deputy Commissioner. “ Ngin iai bteng ban ïakren bad pynsngewthuh ïa baroh lang halor kane hynrei hadien kata lada ki dang ïai pyrshah ka sorkar kan sa bishar kumno pat ban leh.
U la ong tang kawei “ Ka sorkar ka kular ba kan buh ïa kita ki jaka ban peit pyrkhing ïa ka rung ka mih ki briew khnang ba ki mynder kin ym ïoh lad ban rung shapoh kane ka jylla”.