Shillong, Lber 28 : Ka ophis Directorate of Food and Civil Supplies and Consumer Affairs mynta ka sngi ka la kyntait ïa ka jingmih khubor ba ka Meghalaya ka la duna ki tyndong lyer shet jingshet ne ki LPG da kaba ong tang hapoh ki lai sngi ka la sam 22094 ki tyndong lyer shet jingshet kata naduh ka 25 haduh ka 27 tarik Lber kaba mut ym duna ïa ka 7300 -7400 ha ka shisngi.
“ Ym don kano kano ka jingduna bad ki LPG jong ki long ïing ha ka jylla” ong ka khubor na ka ophis Directorate bad ïa ka rukom sam la ïai bud dien man la ka sngi da ki bor synshar district bad jongka jylla ruh kumjuh ruh da ka jingïatrei lang bad ki Oil Marketing Company.
Ka don tang khyndiat eh ka jingthut kata hapdeng ka 20 tarik Lber na ka daw ba la pynkylla ïa ka polisi treikam namar hap pynkylla ïa ka e-KYC, kaba la ktah ïa ka rukom sam bad na kata ka daw sa saphriang ki khubor hamsaia kiba pynsyier bad pyntieng ïa ki paidbah hynrei ïa kane ka jingeh la lah ban pynbeit noh hadien ka 24 tarik Lber bad ka rukom sam ka la ïaid beit ïaid ryntih namar ym duna ïa ka 30 trok ha ka shisngi la sam ïa ka LPG.
Ka jingeh khyndiat ka long ïa ki Tyndong lyer shet jingshet ha ki dukan, hotel bad ki guest house namar ka Ministry of Petroleum ka pynkylla ïa ki kyndon treikam hynrei ka sorkar jylla ka la shim khia ïa kane bad bud dien bad ka sorkar pdeng khnang ba kan ym ktah ïa ka kam jngohkai kaba ka jylla ka shaniah tylli, nalor ba ka jylla kam don ki pipe gas bad kiwei kiwei.
Kumba long mynta ka jingsam ïa ki Commercial LPG ka long hadpeng ka 190 haduh 200 ha ka shisngi. Na ka liang u Chief Secretary ruh u la lum ia ka jingïalang ha ka 27 tarik Lber ban peit bniah ïa kane ka kam. Ki Inspector ki leit bud dien man la ka sngi bad phah ïa ka kaiphod sha ka sorkar pdeng bad la mana ruh lada don kiba shim kabu ban die tam ïa ka dor.
Hadien ka jingtohkit ha ki thaiñ Jail Road la bthah ïa ka Sunny Indane Gas Agency ban leit sam beit shaki thliew ïing jong ki briew hadien ba la ïohi ba ka don ka jingïa ïeng lait bad lum paidbah ban ïoh tyndong lyer shet jingshet.
Kumta ka ophis Directorate ka kyntu ïa ki paidbah ba kim dei ban shepting ne syier namar ka LPG ka dang biang bad la kyntu ruh ïa ki lad pathai khubor ba kim dei ban pynmih ïa ki khubor khlem da pynthikna shwa na ki bor ba dei peit. Ki Helpline number toll free 1967 bad WhatsApp 9402327737.
