Shillong, Nailur 26 : U Myntri Rangbah ka jylla u Conrad K Sangma u la ong ba um pat ïoh ktien ei ei ruh na ka BJP ba kan weng noh na ka sorkar MDA.
“ Ym pat ïoh ktien ne jingthoh na ka BJP ba kin mih noh na ka sorkar MDA kumta ïa kane ka jingkylli dei ban kylli ïa kiba byrngem ban mih” ong u Myntri Rangbah.
U Myntri Rangbah u la kyntait ruh ïaka jingkren u Mohan Madhukarrao Bhagwat uba ong ba baroh ki nong India ki dei ki Hindu da kaba ong “ Ka India ka dei ka ri ba pdiang lut ïa baroh ki jait niam, kumta baroh ki don ka hok ban bud ïa kano kano ka niam”.
“ Katei ka dei tang ka jingkren shimet jongu bad u don ka hok ban kren kum u khlieh jong kata ka seng ba u mihkhmat bad ngam don ei ei ban kynthoh ïaka jingsngew shimet jongu hynrei kum ka ri ngi don ka Riti Synshar kaba pdiang lut ïa baroh ki niam bad ki jaidbynriew” ong u Myntri Rangbah.
Ki khubor ki la mih ha kine ki khyndiat sngi ba ki don ki nongïalam ka BJP kiba kwah ban mih noh na ka MDA.
