Shillong, Jymmang, 12: Watla ki paidbah nongshong shnong ki ju khmihlynti bha ban ïohi ïa ka jingïatreilang hapdeng ki seng riewlum ha kane ka jylla, hynrei ha kane ka kynti ka Hills State Peoples Democratic Party (HSPDP) bad ka United Democratic Party (UDP) kiba ju ïatreilang baroh shikatta hapoh ka shatri jong ka Regional Democratic Alliance (RDA) shwa jong ka Ilekshon 2018, ki la rai ban ïa ïaid noh ka la jong ka lynti ha kaba kan ym don shuh ka jingïatreilang ha shwa ka elekshon ka ban sa long ha u snem 2023 sha ka Iingdorbar Thawaiñ ka Jylla.
Ha ka jingïakren bad ki lad pathai khubor ha ka sngi Palei, u President ka Hills State Peoples Democratic Party (HSPDP) u Bah KP Pangniang, u la ong, “ka RDA ba la pynkha ha ka por jong u President barim ka UDP u Dr.Donkupar Roy bad u President barim ka HSPDP u Bah Ardent Basawiawmoit, ha ka por ba la pynlong ïa ka jingïalang ha u Rymphang, nga la pynpaw ba ka RDA ka dang dei ban tyllun shakhmat tangba kan ym don shuh ka jingïatreilang hashwa ka elekshon kumba ngi la leh ha u snem 2018.”
“Ïa kata nga la pyrshang ban pyrshang ban pynkynmaw ïa u Chairman bad ïa u Secretary jong ka RDA naduh u Nohprah, 2021 ba la dei ban khot jingïalang khah khah hynrei na ka liang jong ka HSPDP ka burom ïa ka RDA bad ngi sngewdonkam ba kan don ka RDA bad ka jingïatreilang jong ki party riewlum kumba ngi sngewdonkam ma ngi (HSPDP) ai ngin ïaid shaphrang,” u la ong.
“Kumba la mih dang shen ha ka kotkhubor ba ka UDP bad ka HSPDP kin ïaid noh la kajong te ïa kata ngam tip bad mano ba pynpra ïa kata hynrei kum u President ka HSPDP ngim pat shim rai ban ïaid noh la ka jong,” la ong u Bah Pangniang.
“Ngi dang ap khmihlynti ba ka RDA kan ïaid shaphrang ha ka jingïadei jong ngi ki ar tylli ki Party wat lada kam don shuh ka jingïatreilang ba ka UDP hashwa ka Ilekshon,” u la bynrap.
“Ka rai ban ym ïatreilang shuh hashwa ka Ilekshon ka dei kaba la shim hashwa ka elekshon MDC. Lehse ka jingïatreilang ka lah ban long hadien ka Ilekshon. Ïa kane ngi ladep ïathir sani bha,’ la ïathuh u Bah Pangniang.
