Shillong, K’ lyngkot 12: Ka Kur Khongjirem ka la pynlong ïa ka jingïakynduh kaba shisien shi snem ha shnong Wahkhen ban wanrah ïa ka jingïatylli ka jingïalong kawei.
Ha kane ka dorbar, ka kur ka la shim ruh ïa ki katto katne ki rai kiba kynthup ba u kpa ne u shynrang na ka jait kur Khongjirem, um lah ban ai jait ïa ki khun sha u lada u ïapoi kha bad kano kano ka kur hynrei ka jingshim jait ka dei ban long beit na ka kmie na kynthei.
Kawei pat ka rai ka long ban kyrshan ïa ka jingïaleh ka KHADC ban pynneh ïa ka jingai jait sha ka kmie ne kynthei.
Ka dorbar kur ka la rai ruh ba kito kiba sah sha kylleng ki jaka, ba kin ym bud tynneng ban pynkylla ïa ka jait sha kino kino kat sha ba ki don ha kane ka snieh pyrthei hynrei ki dei ban ai beit da ka jait Khongjirem.
Ka jingïalang ha ka jingpynïaid u President Bah Wet Khongjirem ka la pyllong ruh ka jingai khusnam ïa ki dkhot ka kur kiba la wanrah nam ïa ka kur kynthup kiba pass bha ha ki eksamin, kiba la ïoh khusnam halor ki kam noh synniang jong ki sha ka imlang sahlang.
Kiba shah pynkup burom ki long ka samla Saharalinda Khongjirem, ka Mung Khongjirem, ka Emdur Khongjirem bad u Frederick Khongjirem, kiba la wan shakhmat ha ka eksamin matrik ne SSLC bad u Skhembor Khongjirem uba ïoh ïa ka khusnam Meghalaya Art and Heritage Award ha ka put ka tem na ka sorkar jylla Meghalaya.
Shwa ïa kane, la ïoh ruh ka kaiphod kut snem na u Secretary Bah Pynjapbor Khongjirem. La ïoh ruh ïa ka jingïathir ïa ai jingmut na ki riew rangbah ka kur kynthup u Rgh. Komik Khongjirem, Babu Kular Khongjirem, Bah Skhembor Khongjirem, bad na ki longkmie bad ki samla ka kur.
