Ym lah pdiang ka MDC ban aiti ïa ka dewlynnong Lumpongdeng sha ki kompeni ba hehspah

Shillong, Iaiong 10: Ka MDC jong ka seng Voice of the people Party (VPP) na Malki Laitumkhrah Constituency ka Kong Deity Majaw kaba dei ruh ka EM ka tnat Law hapoh ka Executive Committee ka KHADC ka pynpaw ïa ka jingbym lah ban pdiang ïa ka jingpynshai jong u Myntri Rangbah ka jylla u Conrad Sangma halor ka jingtei hapoh ka Dewlynnong Lumpongdeng.
Haba leit ai mynsiem ïa ki dkhot jong ka Green Tech Meghalaya kiba la sdang ïa ka jingshah thngan ba khlem buh por ka la ong ba kam lah ban ngeit ba ki jingtei ha ka Dewlynnong kan long tang shipor namar lah aiwai haduh 60 snem ha ka jaka kaba heh haduh 66 akar bad ha ka jingpynlut kaba long T. 330 klur.
Kum ka MDC ka wer ïa baroh ki samla bad ki nongshong shnong ba kin mih shakhmat ban pynpaw ïa ka jingpyrshah, lada ki don ka jingieid ïa ka mariang, namar ha katei ka Dewlynnong ki don bun ki sim ki doh, ki jait jingthung bad kadei kaba pyngngad bad ka kyntu ruh ba lada ka Sorkar ka kwah ban wanrah kam pynroi dei ban leh sha kiwei pat ki jaka ym ha katei ka jaka.
Haba kylli ka la pynpaw ba kane ka jingleh ka Sorkar kadei hi tang na ka bynta jong ka bad ha kaba khatduh u paidbah un duhnong.
Ka la bynrap ruh da kaba ong kum ka MDC kaba ieid ïa ka mei mariang ka la pynpaw ïa ka jingpangnud haba ïohsngew ba ka don ka jingthmu ban tei ïa ki jingtei kiba heh ha katei ka jaka. “Katei ka jaka kadei kaba don ki sim ki doh um, nangta ki jingthung jingtep kiba pynitynnad bad pyn pyngngad ïa ka mariang, lada shah pynjulor noh katno kan ktah ïa ka mariang,” ong ka MDC.