Ym kwah ka VPP ban ngat apot ki Samla pule kum ha ka CUET na ka NEP 2020

Shillong, Nailar 22: Ka Voice of the People Party (VPP) ka pynpaw ïa ka jingsngewkhia kaba khraw halor ka kynrum kynram kaba la neh la katto katne por hapdeng ka Meghalaya College Teachers Association bad u Vice Chancellor ka NEHU ha kaba ïadei bad ka rai jong u Vice Chancellor ban pyntreikam noh ïa ka National Education Policy 2020 naduh une u snem pule (academic session).
Ka kyrwoh ba la phah da u President jong ka Seng, u Bah Ardent Miller Basaïawmoit, ka ong ba ka Seng ka sngewkhia halor ka jingeh ki samla pule bad ruh ka pynlong ba ïa ka Seng ban buh jingkylli ba haduh katno ka jinghikai kan seisoh lymda la pynbiang shuwa ïa ki katto katne ki bynta kiba donkam eh, kum ïa ka jingtei ïa ki kamra klas bad kiwei, ka jingpynbun ïa ki nonghikai bad kiwei kiwei ki jingdonkam shuwa ban pyntreikam ïa kane ka policy ba thymmai. “Kum ka Seng ngi kwah ruh ban kyntu ïa ki samla pule ba kim dei ban shah pyngngop ha ki katto katne kiba kwah ban pyntreikam beit noh ïa kane ka policy mynta mynta hi u snem pule khlem da pyrkhat bha shuwa ïa ki katto katne ki jingeh ba ngi la kdew sha khmat”, la ong u Bah Ardent.
Ka Seng ka kwah ruh ban kren da kaba shai kdar ba kam pyrshah satia ïa ka jingpyntreikam ïa ka NEP hynrei ka buh ka jingkylli haduh katno ki jaka pule bad ki kolej ki la pynkhreh ban pyntreikam ïa ka NEP naduh mynta hi u snem khlem da klet ruh ban peit ïa kito ki jingeh kiba ka la kdew. Lah ban sngewthuh ba ka NEP 2020 kan wanrah ïa ki subject pule kiba thymmai kiba kynthup ïa ki vocational courses, namarkata, ki kamra klas kiba thymmai ki long kiba donkam, bad ruh donkam ïa ki nonghikai kiba thymmai nalor kiba la don lupa ban hikai ïa kine ki subject kiba dang mih thymmai, na kata ka daw dei kine ki ar tylli kiba dei ban pynkhreh janai shuwa ban pyntreikam ïa ka NEP 2020.
Shuh shuh, u Bah Ardent u la ong ba kum ka Seng ka sngewkhia ïa ka jingbym don mon ka sorkar ban pynmih ïa ki post nonghikai thymmai ha ki kolej kaba pynbor pat ïa ki kolej ban pynmih dalade kaba ym ïa ryngkat kyrdan pat bad ka sanctioned post kat kum ki kyndon ka UGC. Kane ym tang ba ka wanrah ïa ka jingïapher ha ka jingsiew hynrei wat ha ka jingkhia ka kam ruh. Ka NEP 2020 ka ban jur ruh ba donkam ban ai autonomy ïa ki kolej, kaban buh jingeh pat ïa ka sorkar jylla ban teh lakam ïa ka rukom treikam ki kolej bad ki shlem pule kaban wanlam pat sha ka jinglaitluid jong ki ban buh dor katba ki sngew bit ban buh dor ïa ka bai skul bad kane pat kan pynkhia ïa ka jingkit ki samla pule khamtam kito ki ban wan na ka ïing ka sem ba duna ka ïoh ka kot.
Ka Seng ka ong ba ka sngew dei ban pynkynmaw ïa ka rai ka sorkar jylla ban pdiang ïa ka CUET khlem da peit ïa kiei ki jingeh kiba ki samla pule kin mad. Da kiba bun bah ki samla pule ki la duh ei la ka lad ban bteng ïa ki jingpule ha ki under graduate courses na ka daw ka jingduna palat ki jaka thoh ïa ka eksamin CUET. “Namarkata ka Voice of the People Party kam kwah ba kum kane ka apot kan wan jia biang ha ki samla pule lada pyntreikam ïa ka NEP”, la ong u President ka VPP.
Namarkata, na ka bynta ka bit ka biang ki samla pule bad ruh ka pule puthi ha ka jylla ka VPP ka kyntu ïa ka sorkar jylla ba kan shimkhia noh mardor ban tuklar ïa kane ka mat bad ruh ban pynkut noh shi syndon ïa ka jingïatan tyllai hapdeng ka MCTA bad u Vice Chancellor ka NEHU.