Ym kren shai u Myntri halor ka jingdawa ki ACHIK, kwah ban kynduh markhmat

Shillong, Naitung 20 : U Myntri Rangbah ka Jylla, u Conrad K Sangma um shym la kren shai satia la u ïahap neem ïa ka jingdawa jong ka kynhun ACHIK halor ka ishu Roster System bad ruh ban pynlong nongbah Tlang ïa ka nongbah Tura.
Haba kren bad ki lad pathai khubor hadien ka jingïalang jong ka kynhun Myntri, u Mytnri Rangbah u la ong ba u kwah ban kren shai ba ka eh ïa ki ban phaidien biang mynta halor ka jingpyntreikam ïa ka Roster System namar ïa ka rai la dep ban shim hadien ba la syllok lang ïa baroh.
Lah ban kdew hangne ba ka ACHIK ka la pynlong da ka jingshah thngan ban dawa na ka sorkar jylla ban pyntreikam ïa ka Roster na shadien ha ka thungkam thungjam bad ruh ban pynlong ïa ka Tura kum ka nongbah Tlang.
“Haba ïadei bad ka Roster System, ka Sorkar ka la dep ban shim ïa ka rai hadien ba la syllok sani bha bad baroh kiba don bynta, bad ïa kane ka rai la pyntip bad la pynshai sha baroh ba kynthup ïa ka ACHIK, bad hadien kata ka jingïasyllok la ïaid shakhmat ban shim ïa ka rai ban pynmih noh ïa ka Office Memorandum kaba thymmai,” u la ong.
Shuh shuh haba kren pat halor ka jingdawa ban pynlong nongbah Tlang ïa ka Tura u la ong, “Ka thong jong ka Sorkar ka long ban wanrah ïa ka roi ka kiew bad ka mini secretariat kaba la buh ha Tura kadei kawei ka matti kaba khraw ban ïarap ïa ka thaiñ, da kaba pynkhlaiñ ruh ïa ki tnat treikam ha ki tnat treikam bapher bapher jong ka Sorkar ban pynthikna ba ka synshar khadar kan jan sha ki paidbah..”
U ong ruh ba ka jingdawa jong ka ACHIK ka long ban pynjan ïa ka synshar khadar sha ki paidbah bad ka sorkar ruh ka leh ïa kata mynta watla ka dang donkam shibun ban leh.
U Myntri Rangbah u la pyntip ruh ba shen ha ka jingleit jong u sha rilum Garo un sa leit ban kynduh ïa katei ka kynhun.