Shillong, Rymphang 14 : Ka Meghalaya State BJP ka la pynpaw ba kan ïai ap ïa ka jingtohkit (judicial enquiry) ba la thung da ka sorkar jylla haba ïadei bad ka jingjia bthei dynamite ha Mynsngat, East Jaiñtia Hills, hapoh ka par dewïong beaiñ kaba don ha Thangsko bad ong ruh ba kaei kaba donkam eh ka dei ka kam ym ka jingdonkam ban phah hiar shuki ïa u Myntri Rangbah ka jylla u Conrad Sangma.
Ïa kane na ka liang ka BJP lyngba u Nongaiktien ka State BJP u Bah M Kharkrang, u la ong ba ka party kan ïai ap shwa ïa ka jingmih na ka jingtohkit ba la thung da ka sorkar haba ïadei bad ka jingjia ba khlad ki nongbylla tih dewïong ha katei ka district bad kumjuh ruh ka jingdon jong ki krem dewïong beaiñ ha katei ka thaiñ.
“Kumba ka long mynta ngin ym lah ban kren eiei halor ka jingdonkam ban phah hiar shuki noh ïa u Myntri Rangbah ka jylla u Conrad Sangma, hynrei ngin ïai ap shwa ïa ka judicial enquiry ba la thung da ka sorkar jylla halor ka jingjia ha East Jaiñtia Hills,” ong u Bah Kharkrang.
U Bah Kharkrang u la ïathuh ruh ba na ka liang u Myntri Rangbahduh ka ri u Narendra Modi, nangta ka Myntri Pla Tyngka ka Nirmala Sitharaman ki la dep kren ïa u Myntri Rangbah ka jylla u Conrad Sangma bad ki la tyrwa ruh ka jingïarap pisa halor kane ka jingjia bad kaei kaba donkam ka long ka kam ym dei eh ïa ka jinghiar shuki.
