Ym ïahab ka HITO ba thmu kyrshan pule ka USTM ïa ki khynnah ba shah kyndang na Assam

Shillong, Naitung 28: Ka seng Hynñiewtrep Integrated Territorial Organization (HITO), ha ka shithi ba ka la phah sha u Chancellor ka University of Science and Technology Meghalaya (USTM) kaba don ha 9 mer Ribhoi District, ha kaba ka la pynpaw ïa ka jingsngew bym ïahab halor ka Mission Rehabilitation Education ba la buh da kane ka skulbah kaba thmu ban pynïoh ka jingkyrshan ïa ka pule puthi ïa kito ki khynnah kiba ki longïing jong ki, ki la shah kyndang na jylla Assam.
Ha ka shithi u President ka HITO u Bah Donbok Dkhar haba pynpaw ïa ka jingkyrshan halor ki kam ba bha ïa ka hok longbriew manbriew, hynrei u la pynpaw pat ka jingpyrshah halor kane ka jingthmu khamtam haba ka kynthup ïa ki riew shimet kiba ym dei ki nongshong shnong ka Meghalaya ne ki nongshong shnong kiba hap hapoh ka kyrdan jong ka aiñ jong ka ri India.
“Kan long kaba shai ba ki khynnah ba phi ai jingmut ban kyrshan ki dei kiba don bynta bad ki poi wir beaiñ, ki briew kiba ym lah satia ban kam ba ki dei ki nongshong shnong ka Meghalaya lane shano shano ki jaka kiba hapoh ka ri India. Ban pynsuk ïa ki ban pynïasoh bad ka pule puthi ka jylla jong ngi kam dei satia ka kam leh isynei; hynrei kadei ka jingleh kaba thew jngai kaba lah ban ktah ïa ka imlang sahlang bad ka kam saiñ hima sima. Kane ka jingleh kan ktah ïa ka jylla, naba kan ailad ïa ka jingkhang ban plie ba kin ïoh ban sah slem, nangta kin sa ïoh ki syrnot nongshong shnong ne ki domicile certificate, bad suki suki kane kan ktah ïa ka jingkam ha ka saiñ pyrthei ka ban pynpra ïa ka hok ki trai ri trai muluk ki nongshong shnong ka Meghalaya,” ong u President ka HITO.
Ka seng ka pynpaw ruh ka jingsngewkhia halor ka jingshngaiñ jong ka ri lada ailad ïa kane. Haba phai sha ka jingïakajia halor u pud u sam, kaba kynthup ka jingkiew ka jingrung beaiñ ha shilynter u pud u sam ka India Bangladesh bad ka jingmih ki lad syntiat halor ki kam kiba ïadei bad ka ISI kiba don jingïasoh bad ka Bangladesh. Ka Northeast, bad ka Meghalaya kyrpang, kam dei ban long ka jaka kaba jem lyngba ki poi wir kiba khlem kot khlem sla.
“To ngin long kiba shai kane kam dei ka jingpyrshah ïa ka pule puthi ne ka bha ka miat ki khynnah pule. Kum ka seng kaba don ka jingangnud ban ïada ïa ka khyndew ka shyiap jong ka Meghalaya, ki nongshong shnong, bad ka jingithuh ïa ka kolshor, bad kumjuh ruh ki lad jingïada ïa ka riti synshar ka ri kum ki nongshong shnong Scheduled Tribe hapoh ka Sixth Schedule,” bynrap ka HITO.
“Ngi pynpaw ka jingkyrmen ha ka jingstad bad ka jingsngewthuh ba jylliew halor ki jingshisha ha shwa ba phin shim ïa kano kano ka rai,” ong ka HITO.