Shillong, Naitung 03 : U Myntri ka tnad Public Health Engineering (PHE) ka jylla, u Bah Renikton Lyngdoh Tongkhar u la pynpaw ïa ka jingbymhun halor kajingpyntrei ïa ka skim Laitkor Greater Water Supply Scheme (LGWSS). “Ngam hun satia ïa ka jingpyntrei ïa katei ka kam bad nga la rai ban khot ïa ka jingïalang ha ka sngi Nyngkong namar ngam kwah ban ïohi ba ki briew kin mad jingeh na ka daw ka jingbym treikam bha ki kontraktor,” ong u Myntri hadien ka jingwan jurip ïa katei ka projek ha Laitkor.
U la byrngem ruh ban leh da kaba tyngeh halor ka jingpynsuki ïa ka jingpyntrei. “Ngin sa leh da kaba tyngeh bad wat ban pynduh noh ïa ka kam ruh. Lada u kontraktor um don mon, ngan ong ïa u ban ieh noh ïa ka kam sha ka tnad ban wad lad wat lynti da kawei namar ngim kwah ban ailad ba kan jia kumne,” u la bynrap biang. Katei ka projek ba 28 klur kaba la sdang ha u Naiwieng 2020 ka la buh por ban pyndep ïa ka ha ki arsnem.
“U Kontraktor u la dei ban pyndep la kumno kumno 70 persen ïa ka kam mynta hynrei haba ngi leit ban peit ka kam wat tang 10 persen ruh kam pat dep. La kumno kumno tang kumba 30 lak na ka 28 klur ka kam ba la pyntrei,” u la ong.
