Jowai, Jylliew 13: U bah Sanbor Shullai uba dei u myntri jong ka sorkar jylla ha ka jingwan jurip jong u ïa ka ‘District Museum’ West Jaiñtia Hills District kaba don hadien jong ka Building District Library Cum Auditorium ïa kaba la pynïaid da ka tnad Arts & Culture ula pynpaw ïa ka jingbym hun satia ïa kane ka Museum kaba duna palat nadong shadong haba ïa nujor bad kiwei.
U Myntri ula ong kam ïahap shuh ban khot ïa ka ka Museum lada peit naduh ka jingrit palat jong ka jaka, ka jingbym biang ki tiar ki tari, wat ki jaka buh ïa ki tiar ruh kin long shuh kiba biang bad ki lah ban sniew noh na ka jingbam sarang.
Wat na ka liang ki nongtrei jong katei ka Museum ruh kila pynpaw ïaka jingeh na ka jinglong sngem jong katei ka jaka buh ïa ki tiar ki tar, kiba la dep ban ujor sha kiba bor kiba dei peit hynrei haduh mynta kala shuh sah kut kumto.
Halor kane u Myntri ula pyntip ba haduh mynta ym shem la poi kano kano ka jingujor sha u, da kaba kyntu ïa kitei ki nongpynïaid ba ki dei ban phah ïa ka copy kaba kila dep ujor, khnang ba un ïoh ban pynshitom ïa ki ophisar kiba dei peit ki bym shem la shim khia ïa ka kam kaba ki trei.
Ula kyntu ïa kitei ki nongpynïaid ka Museum ba ki dei ban pyntip beit beit sha u namar bunsien ki kut tang ha ka miej ki ophisar, da kaba u ong ruh ba lada “phi kwah ba ka jylla kan kiew ba baroh ki liang dei ban treihok ïa ka kam bad ha ka juh ka por ki jingkyrkhu ki wan na u Blei”.
