Ym hun ki paidbah, kynnoh bym shai ka jingjied ïa u Myntri shnong ka Nongbrei-Nongdom

Mawkyrwat, ‘Naitung 13: Ki paidbah jong ka shnong Nongbrei-Nongdom kaba hap hapoh ka South West Khasi Hills District ki la pynpaw ïa ka jingbym hun ha ka jingjied ïa u Myntri jong ka shnong Nongbrei-Nongdom.
Kane ka jingbym hun jong ki paidbah ka long halor ka jingkynnoh ba la jied ïa u Myntri shnong da ka lynti jong ka jingbym pynshai paidbah ne ym da ka lynti kaba dei.
Kumta ki nongshong shnong jong kane ka shnong, ki khlieh shynrang kiba dei ban ïoh thep ïa ka vote ban jied ïa u Myntri ki don kumba 245 ngut, hynrei ha ka jingjied ïa u Myntri thymmai ki nongthep vote ki wan tang 83 ngut katba kiba jah ki long kumba 162 ngut namar ki nongshong shnong kim ïoh ïa ka jingtip kaba biang bad kaba tikna.
Halor kane ka kam uwei na ki riewrangbah jong ka shnong Nongbrei-Nongdom, u Bah M. Marweiñ ka jingïakren bad ki lad pathai khubor u la ong ba ki nongshong shnong jong ka Nongbrei-Nongdom ki la kyrpad ïa u Syiem bad ïa ka Dorbar Hima ba kin ïa pynbeit noh da kawei ka jingjied ïa u Myntri ka ban long kaba ïaid beit ïaid ryntih bad kaba khuid khnang ba ki paidbah kin da sngewhun ïa ka jingjied ïa u Myntri Shnong uba thymmai.