Ym hun ka Synjuk Nongsynshar Shnong US ba suki palat ka jingpyntrei ïa ka surok fourlane

Shillong, Jylliew 17: Ki nongïalam ka Synjuk ki Nongsynshar Shnong ka Upper Shillong ryngkat lang ki heh na ka National Highway Infrastructure Development Corporation Limited (NHIDCL) kumjuh ka jingdonlang ki heh sorkar, nangta ki ophisar na ophis Deputy Commissionere ka East Khasi Hills ryngkat ki heh pulit, ki ophisar na kiwei ki tnad kumjuh u BDO ka Mylliem, ki la mih lang khrui ban leit jurip ïa ka jingpyntrei ïa ka surok fourlane da kaba sdang na jingkieng Umshyrpi ter ter haduh ka khongdong ban poi sha 3 Mer, Upper Shillong.
Ha kane ka jingjurip ki nongïalam ka Synjuk ki la pynpaw ïa ka jingbymhun halor ka rukom ïaid ka jingpyntrei ïa kane ka surok Shillong – Dawki da kaba ong ba ka jingtrei ka la suki shaba palat pud.
Ha kane ka jingjurip na ka liang ka Synjuk ki la kdew ruh ïa ka jingdonkam ban ker skhem bha ïa ki kynroh surok thymmai bad ruh ban peit ba ki jaka ba dang pyntrei kim dei ban buh jingma pat ïa ki nongleit nongwan.
Kaba kham kongsan ba ka Synjuk ka kyntu ïa ka NHIDCL ka long ba kin pynstet katba lah ïa ka kam khnang ba ka jingshah ktah ki paidbah na ka dheng kali kan ym jia shuh kumba jia mynta ha kaba ki paidbah ki hap ban ap da ki bun bun kynta tang na Upper Shillong ban poi sha Ïew kynthup ïa kito kiba leit buh skul bad kiba leit trei bad leit bylla.
Haba kren bad ki lad pathai khubor u Adviser jong ka Synjuk, Bah Daniel Thangkhiew u la ong ba ka bynta kaba hakhmat eh jong katei ka jingjurip ka long ban kyntu ruh ïa ka NHIDCL ba kan kham pynstet ïa ka kam khnang ba ki paidbah kin ym mad shuh ïa ka dheng kali kaba la pynsyrtok naduh dang step da ki kynta kynta.
“Ngi la dep ban pynpaw ha ka NHIDCL ïa kaei kaba ngi lap bad na ka liang jong ki ruh ki la pynpaw ïa la ka jong ka jingeh ba ki kynduh ha ka jingtreikam. Tangba ki la kular pat ïa ngi ba kin sa pyrshang ban shimkhia na ka bynta ban pynduna ïa ka dheng kali,” ong u Bah Daniel.
Ha kajuh ka por u la ïathuh ba na ka liang ki Dorbar Shnong ruh kin ai ka jingïatreilang bad ka NHIDCL na ka bynta ban pynstet ïa kane ka projek namar lada ka ktah ïa ka Upper Shillong ka la ktah lang ïa baroh ka leit ka wan jong ki kali kiba ïaid lyngba kane ka surok.
Nangta, u la ong ruh ba na ka Synjuk ki kwah bad kyntu ïa ka NHIDCL kan pynbha shwa ïa ka surok kaba na Umshyrpi shaduh 3 Mer khnang ba ka leit ka wan kan ym ktah palat.
“Kaba ngi isynei eh ka dei ïa kali shimet kiba kit nongpang kiba ngat ha kane ka dheng kali da ki kynta. Lada dei ki ambulance ki kham suk ban ïaid namar ki don siren. Kumta ngim kwah shuh ba kum kine ki jingjia kin ïai jia biang,” u la bynrap biang da kaba pyntip ba ka NHIDCL ruh ka kular ban shimkhia mardor ban pyndep noh ha kine ki khyndiat taïew ïa kitei ki bynta ba kyrpad ka Synjuk.
Ha kajuh ka por ka Synjuk ka pynpaw ïa ka jingkyrshan ïa ka jingkhang ïaid na jingkieng Umshyrpi ha ka por miet namar kane kan ai por kham kylluid ïa ka kompeni ban trei kham stet ïa ka kam.
La ïoh ruh ka jingkren na u BDO ka Mylliem Bah Tosanbha Marwein uba la pyntip ba ka jingwan jong ki ban jurip ïa katei ka jingpyntrei kadei hadien ba ka la don ka jingujor na ka liang ka Synjuk haba ïadei bad ka jingpyntrei ïa katei ka surok fourlane.