Shillong,Nailar 21 : Ka Synjuk ki Nongsynshar Shnong Upper Shillong ka la pynpaw ïa ka jingbym hun halor ka rukom pyntrei surok jong ka NHIDCL wat hadien ba ka la don ka jingleit jurip lang naduh ki bor distrik, na ka liang ka Synjuk, na ka NHIDCL bad kumjuh na kiwei ki tnad sorkar.
Halor kane ka bynta, na ka liang ka Synjuk ka la lum ia ka jingïalang ba kyrkieh ha ka 21tarik mynta u bnai ha Community Hall Nongkseh halor ka jingslem palat ban pyntrei ïa ka surok Four Lane naduh Jingkieng Umshyrpi ter ter haduh 7 Mer Umdiengpun. Ha kane ka jingialang ba kyrkieh ka Synjuk ka la shim ruh ïa kine ki rai harum.
Ka mat kaba nyngkong ba ka Synjuk ka shim ka long ban pyntikna ba ha ka por ba ki pynpra ia ka kynroh hajan ka jingkieng Umshyrpi dei ban peit ba kan don ka jingïada kaban pyntikna ïa ka jingshngain jong ki paidbah ka thain bad khamtam ki nongïaid kjat. Nalorkata, la ong ruh ba kam dei ruh ban don kano kano ka jingktah ïa ka surok kali lane ban wanrah ïa ka dheng kali.
Kawei pat ka mat ba ka Synjuk ka buh ka long ba ha ka por ba pynpra ïa katei ka kynroh kam dei satia ban ktah pat ïa ka jaka pynlang jong ka Lummawbah kaba don ha ki bynta ba shapoh jong katei ka kynroh lane ba kan wanrah ïa ka jingma ïa ki paidbah kiba leit tongum lane saitjain ha ka jaka saitjain kaba don hajan.
Shuh shuh ka Synjuk ka la ong ba ha ka jingleit jurip lang kaba la long ha ka 17tarik Jylliew, 2025 na ka NHIDCL ka la kular ha ka Synjuk ba ïa ka bynta ban pynbha ïa ki thliew hapdeng surok naduh Umshyrpi haduh 7Mer Umdiengpun ban pyntyllun ïaka leit ka wan ki kali khlem jingthut dei ban pyndep ha ki 20 sngi hynrei la ong ba haduh mynta ym pat leh ei ei.
Ka Synjuk ka ong ruh ba ka surok naduh Jingkieng Umshyrpi, ka lad 4Mer, lad 5Mer haduh 7Mer Umdiengpun, ka surok ka la sniew haduh katta katta kaba la wanrah ïa ka jingduh kali khah khah bad long ruh ka daw ka jingdheng kali kaba jur haduh ba ka la ktah bha ïa ka leit ka wan jong ki paidbah.
Shuh shuh la ong ruh haba ïadei bad ki surok ban leit sha ki shnong kiba donkam ban leh noh mardor kumba la ia kut hynrei la shu ieh sah kumto khlem leh ei ei kaba la wanrah ka jingthut ïa ka leit ka wan jong ki nongshong shnong khamtam eh ïa ki samla pule bad ki nongkhaii na kito ki shnong.
Kane ka long katkum ka kyrwoh ba la phah da u Bah MR Thangkhiew General Secretary, Bah M Nongneng President bad Bah Myrank Thangthiew Vice President jong ka Synjuk.
