Shillong, Naitung 03: Ka Meghalaya Awaken Concerned Citizen (MACC), ka la pan jingshai kaba pura lyngba ka Department of Health & Family Welfare jongka Sorkar Jylla halor ka jingleit ban bret pathar noh ïa ki Dawai shapoh Marten. Hynrei wat hadien ba ka Directorate of Health & Services (MI) ka la pynshai lyngba ki Kotkhubor ba ki dawai kidei kiba la kutnoh khlem ïoh pyndonkam ha kapor jongka COVID-19, na ka liang ka Kynhun, ka la pynpaw ba kam lah ban pdiang satia.
Ha ka kyrwoh ba la phah da u Bah Banshai Marbaniang, President ka MACC, la ong ba na ka liang ka kynhun kam lah ban pdiang ïa kane ka bynta namar ym ju kham ïoh sngew ban lap ruh ïa ki dawai ban shu leit bret pathar noh mardor khlem da lah ban pyndonkam ïa ki bad la ju ïohsngew ruh ba bunsien ka jingïateh kular bad ki company bapher bapher lyngba ki Agreement ha kaba iadei ka bynta jong ki dawai lyngba ka Tnat Treikam jongka Health Department jongka Sorkar ba la dei ban pynphai noh pat ïa ki dawai ba la kutnoh shapoh ki Manufacture Company da kaba hap ban pynthymmai da kiwei pat.
Ka kyrwoh ka ong ruh ba ki Manufacturer company ki la don lypa ïa ki jaka ha kaba kumno ynhap ban pyndam noh ïa ki Dawai kiba la kutnoh ym daka shu bret pathar sha lum sha wah namar kane kan ktah ruh ïa ka mariang kumjuh lem bad ka Koit ka Khiah jongki briew kiba ïaid sharum shaneng halor ki kam ki jam ba manla ka sngi. Ka jingktah jong kitei ki Dawai ba la shu bret pathar nyngkong eh kanlong ka jingma kaba khraw halor ka koit ka khiah jong ki paidbah khamtam sha ki Shnong ba marjan kiba dang pyndonkam ïa ki Umbam Umdih na ki pung ba dang markhap bad ka Marten, nalor kata ha kaba ïadei bad ka rep ka riang lem bad kiwei pat ha ki bynta jongka jingsma khamtam kumba la ju lap man kapor ba ka jaka Marten kaba don hapoh Mawlai Mawiong kalong ka jaka ka bym ïoh shuh ïa ka lyer kaba khuid wat ban ring mynsiem ha kaba shaid ba khlaiñ namar ka jingsma kaba shyrkhei haduh katta katta khamtam na ki bor jongki dawai kiba lah ban ktah bad kane la lap ba kala long ka jingpynkheiñ noh haba phai katkum ki kyndon jongka Drugs and Cosmetic Act 1940 & Rules 1945 ba la buh lyngba ka Ministry of Health and Family Welfare jong ka sorkar India ne kumjuh wat haduh ki kyndon jongki aiñ bapher bapher.
Na ka liang ka Kynhun ka la ong ba hadien ba ka la bniah ka la ïoh jingtip shai ba kine ki dawai kidei ki duplicate Medicine lane ki Non-Essential Drugs da kaba shisien ba la ïoh dei ban pyndonkam tang hapoh ka Trial Medication ymlah ban pyndonkam da ki briew namar wat ki Doctor ruh ki salia ban ai ia ka Prescription sha ki Nongpang bad dei namar kane ka daw kaba pynlong ban hap shu leit bret pathar kat shaba lap khlem da wad bniah ïa ki jaka kiba biang ynda haba ki la kutnoh khlem da lah ban pynphai noh pat ïa ki sa shisien shapoh ki Manufacturing Company ne wat ban ïoh pyndonkam da ki briew kiba pang.
U Bah Banshai, u la ong ruh ba ki tiar pyndonkam hapoh ki hospital Sorkar kilong kiba tad dor haduh katta katta namar ymlah ban ïoh da ki Branded Products ne kumjuh wat ki dawai ruh. Ki Materials bapher bapher la hap ban shu thied hi da ki Nongpang na shabar ki Pharmacy. Lada ïoh ka jingsumar napoh ki Hospital sorkar ruh ïakynduh jingeh ki paidbah khamtam kiba wan naki long ïing ba duk, kum ka nuksa haba la ïohi halor kawei ka Longkmie napoh ka Shnong Mawlyndep kaba wan ban kha Khyllung hapoh Ganesh Das Hospital, Lawmali Shillong kala ngat kylla ha ka jingpang lyngba ki tiar ba pyndonkam lyngba katei ka Hospital bad kumjuh ruh haduh ban da duh noh shisyndon ïa la i jong i khun iba dang shu kha hapoh katei ka Hospital.
Shibun ki jingjia kiba mih napoh ki Hospital Sorkar ne wat napoh ki Tnat Treikam jongka koit ka khiah jongka sorkar man la kapor hynrei ymju don ba ïohi ïa ki bad bun na ki Nongmihkhmat kiba long ruh ki MLA ki bunkam tang ban shu put turoi dalade ïalade tang namar ka jingkhraw bor khlem da lah wat ban rah ïa ki jingeh jong u paidbah hapoh ka Cabinet ne wat hapoh Assembly pynban da kaba shu kut ki jingïatai tang hashuwa ka Election lyngba ki tiar jingpynsawa, ki Dukan Sha bad hapoh Surok.
Kiba bun naki paidbah kiba im shapoh ki thaiñ Nongkyndong ki wan na ki longing ba duk ba kyrduh bad don napdeng jongki wat ban thied ïa ka bam ba biang ruh kim lah kotbor. Nalorkata, ka MACC ka ong ruh ba la ju lap ba wat ban thied ïa ki dawai kiba biang kiba kham rem (Essential Medicines) ruh kimlah kotbor shuh. Nalorkata,la ju ïohi ba bun na ki Doctor kiba la pyndep ïa ki Medical Degree kim ju treh ban leit trei shapoh Nongkyndong namar ki sngewthuh ba kimdon jingïohnong eiei ruh em namar bym ïoh plie Clinic ne Pharmacy namar khamduna kiba wan shim dawai Private bad dei namar kane ka bynta bun ki Doctor ki kwah ban don beit hapoh ki Jaka Sor kiba bunsien ki ïoh ban pyndonkam ia ka bor katba ki sngewdei ban ïoh kamai.
Kane ka kynhun ka ong ruh ba sha Nongkyndong ka jingduna Doctor kalong shisha kaba bun haduh katta katta khamtam haba phai lei sha ki CHC, PHC ne Sub-Centre ruh kumjuh. Napoh ki thaiñ Nongkyndong ki Doctor kiba bun ki don kumba 59% percent bad bun na ki kumba 31% kidei kiba dang ioh ia ka kyrdan jingpule Class 12th bad kimlah ban ïoh ia ka Full Medical Degree ban ai ka jingshakri pura ïa ki paidbah.
Na ka liang ka MACC, ka kyntu ïa ka Sorkar Jylla lyngba ka Tnad jongka Koit ka Khiah ba ymdei ban ai jingshai tang hapoh ki Kotkhubor malu mala, hynrei donkam ban ïoh ka jingshai kaba pura khamtam kumba la shem mynta ha kane ka kynti.
