Ym donkam ïa u CM ban resaiñ, ka sorkar kan leit ban thwet ïa baroh kiba donkti : Wailad Shylla

Shillong, Rymphang 11 : U Myntri ka tnad ka Koit ka Khiah ka Jylla, Bah Wailadmiki Shylla u la ïada ïa u Myntri Rangbah da kaba ong ba kam donkam satia ïa u ban resain kumba la don kiba dawa namarba ka sorkar ka la shim ka jingkitkhlieh ban thwet bad pynshitom ïa baroh kito kiba don bynta ha ka jingbthei ha krem dewiong beain ha Thangsko dang shen.
“Ngi shim ïa ka jingkitkhlieh kaba pura halor kane bad ngin pyntikna ba baroh kiba donkti kin ngat ha ka jingpynshitom. Kumta ngam tharai ba ka long kaba donkam ïa u Myntri Rangbah ban hiar shuki,” la ong u Myntri haba kren bad ki lad pathai khubor ha kane ka sngi Balang haba jubab halor ka jingdawa ki Liang Pyrshah ïa ka jinghiar shuki noh jong u Myntri Rangbah.
Shuh shuh u ong ruh ba ym don ei ei ban buhrieh bad dei na kane ka daw ba u Myntri Rangbah u la thung da ka Judicial Inquiry naduh dang sdang. Nangta u ong ruh ba ka sorkar jylla shen kan sa shong bad rai halor ka jingthung ïa u chairman jong ka Judicial Inquiry Commission.
Ha kajuh ka por u ong ruh ba ka sorkar jylla kan leh da kaba tyngeh ïa kito kiba donkti ha katei ka jingjia ba sngewsih da kaba bthah ruh ïa u Deputy Commissioner bad Superintendent of Police ban leh ïa kaba donkam.