Shillong, Rymphang 18 : Ka Expert Committee on State Reservation Policy ka la ai jingmut ban pynneh beit kumjuh ïa ka State Reservation Policy 1972 kumba ka long, haba kdew ba bun ki kynhun ki la ai jingkyrshan ïa kane nalor ka jingma ba kan shah ktah ha ka jingbishar ka ïing Bishar lada pynkylla.
Ka kaiphod bala wanrah da u Myntri Rangbah ka Jylla Conrad K Sangma ha ka Sngi Balang ka ong “Bun na ki Kynhun ba don bynta, ki la kyrshan ban pynneh kumjuh ïa ka Reservation Policy 1972 kumba ka long. Ka Committee ka la ai jingmut ban pynneh ïa ka 1972 Reservation Policy kumba ka long. Kiba bun ki kynhun ki kyrshan ïa kane bad kano kano ka jing pynkylla ka lah ban shah ktah ha ka jingbishar ki ïing Bishar”.
“Ka Committee kam shem ruh ïa ki daw kiba pynbor ban pynkylla ïa ka policy ha kane ka khep. Shibun kiei kiei la lah ban ïoh lyngba kane ka policy bad ki dang don ruh shibun kiei kiei kiba donkam ban ïoh. Ka jingpyntreikam bha bad jingbud thikna kan ai ïa u soh uba kham bha. ïa ka policy la pynbha na ka por sha ka por ban lah pynbiang ïa ki jingdawa ka por bad ka jingdonkam jong ki paidbah ba bun balang” kala bynrap.
Ka kaiphod ka ong “Ka Committee ka ithuh ïa ka 1972 Resolution kum ka Reservation Policy, kaba la don mynta la palat 50 snem. Kano kano ka jingpyrshang ban pynkylla ne pynwan dur thymmai ïa kane ka policy ka lah ban ngat ha ka jingshah bishar jong ka ïing Bishar hapoh ka Indra Sawhney Judgement. Kumta, ka Committee ka ai jingmut ban phikir bha ha ka ban wanrah ïa kino kino ki jingpynkylla ha kane ka policy, namar ka lah ktah ïa ka jingshong shngaiñ jong ka. Ym don satia ki policy kiba biang lut nadong hadong, bad ka long kaba donkam ban pynbha na ka por sha ka por ïa kaba la leh ha kane ka kam ba mynta”.
“Ia kine ki jingai jingmut la ai halor ki kyndon aiñ, ki jingai jingmut u paidbah, bad ki hukum jong ki ïing Bishar khnang ban pynthikna ba ka Reservation Policy kan bteng ban shakri kat kum ka jingthmu jong ka ha ka ban kyntiew ïa ki jaidbynriew ba dang sahdien katba dang sah hapoh u pud u sam jong ka Riti Synshar bad ki kyndon ïing Bishar. Ki jingai jingmut jong ka Committee ki thmu eh ban pynneh ïa ka nongrim jong ka Riti Synshar ban leh ïa ki kam kiba ai jingmyntoi, leh eiei halor ka jingsahdien ha ka imlang sahlang bad ka ïoh ka kot bad ban pynthikna ba ka rukom ai bhah kan ïai bteng ban shakri ïa ki jingdonkam jong ki Jaidbynriew kiba duk tam ha ka Jylla” kala ong.
Ka Committee kala ai jingmut ban pynneh ïa ka status quo, kyrshan ïa ka jingpyntreikam pyrkhing ïa ka Reservation roster system, kaba la pyntreikam kat kum ka Office Memorandum 2022.
“Ka roster ka dei ban treikam manla u snem kat kum ka jingdon ki kam kiba lait. Kane ka system ka pynthikna ïa ka jing pyntreikam bha ïa ka bhah ba la mang bad ïa ka kam ba lait yn pyndap kat kum ki nongrim ba la pruid dak ha ka mukotduma u RK Sabarwal” ong ka kaiphod.
Ka Expert Committee kala ai jingmut ruh ban pynneh ïa ka “Carry Forward” system, kynthup ka jingpynjlan na ka shisnem sha ka laisnem kat kum ka Resolution 1972.
Ka Committee ka la ban jur ruh ba ka jingai bhah ka dei ban buh hakhmat eh ïa kito kiba mad ïa ki jingshah ïuhroit haki snem kiba la leit bad kiba sahdien ha ka imlang sahlang bad ka ïoh ka kot ban ïa kaba kheiñ na ka jingdon paid, bad ong “Wat ki jaidbynriew kiba kham rit paid ki lah ban ïoh kham bun ha ka bhah bad kiba heh paid kim lah ban ïoh ïa kajuh. Ka jingpyrkhat ba nyngkong eh ka dei ka jingsahdien, ka jingshah leh bym hok ha ki snem ba la leit bad ka jingduna ki briew kiba don ha ka jingshakri”.
Ka Committee ka la kyntait ruh ban ai bhah sha ki riewngeit jong ki niam barit paid, da kaba pynpaw ba kane kan long kaba bei-riti. “Kumta, ka jingai jingmut ban ai bhah sha ki riewngeit jong ki niam ba rit paid ka dei ka bym lah ban pdiang kat kum ki kyndon aiñ ba mynta”.
Ka Committee ka ong ba ka mat ban ai bhah lang sha ki jaka pule, kaba hap hapoh ka Article 15(4), ka hap shabar ka jingkhmih ka Committee bad ai jingmut ba “Ka Sorkar Jylla ka lah ban shong pyrkhat dalade halor kane ka mat”.
Ka Committee ka la ai jingmut ruh ban buh la ka jong ka kyrdan ïa ki Economically Weaker Section (EWS) na ka Scheduled Caste (SC), Scheduled Tribe (ST) bad Other Backward Classes (OBC).
Nalor kane, ka Committee ka sngew ba kam ïahap satia ban ai bhah ba kham heh ïa ki riewlum trai muluk ha ki kam Class C bad D, haba kdew ïa ka jingkrih shnong na ki jaka nongkyndong sha ki jaka sor.
