Ym don wat tang ka skul SSA ruh, 2 kilo mitar hap ïaid kjat ki khynnah ban leit skul shaduh shnong Brichyrnot

Khliehriat, Naitung 27: Ka shnong Pandare, ka dei ka shnong kaba don hapoh ka elaka Narpuh hajan ka shnong Brichyrnot, East Jaintia Hills District, ha ka jingjurip la lap ba kane ka shnong kam pat ïoh ïa ka bor ding na ka tnat MeECL, kam don ruh ka surok kaba biang ba bit ban ïaid ki kali, ym tang katta ha kane ka shnong ym don wat tang ka skul SSA ruh, ki khynnah ki hap ban ïaid kjat haduh 2 kilo mitar ban poi sha skul sha shnong Brichyrnot.
Ki nongshong shnong ki dei kiba im da ka rep ka riang, ki rep ïa u kwai, u tympew, u synsar, ki soh ba bun jait, kum u soh trun, soh ñiamtra bad kiwei kiwei.
Ka tnat CSR jong ka company dewbilat, ka Star Cement Lumshnong, ka la shim ïa ka synjam bad ka la sam bor ding , kaba dei ka sorlar Energy, sha baroh ki longiïng kiba kiba don ha shnong Pandare, kynthup ruh ar tylli ki iïngmane ha ka jingpynlut kaba la kot haduh T12.5 lak tyngka na ka bynta ki 22 tylli ki Solar Energy, ym tang katta, ka tnat CSR ka la buh ruh san tylli ki street light hapoh shnong ha ka jingpynlut kaba T23,000 (arphew lai hajar) tyngka kawei ka street light, kane ka jingioh bor ding ka la long ka jingkyrkhu ïa ki paidbah nongshnongshnong, khamtam ïa ki khynna pule.
Haba kren sha ki pathai khubor, u Waheh Shnong jong ka shnong Pandare, u bah Frenly Nongtdu, u la pynpaw ka jingsngew nguh bad ai khublei ïa ka tnat CRS jong ka company Star Cement bad u Manager u Kingsok.K.Borah, kaba la lah ban pynioh ïa kane ka bor ding Solar Energy ha baroh ar phew tylli ki longiing kiba don hapoh shnong bad ar tylli ki iingmane “Lada don slap te ngi ioh duna ka bor ding bad lada don sngi ne bha ka suiñ bneng ngi ïoh pahuh ka bor ding namar ba ka dei da ka solar, hynrei ka lah long ka jingiarap kaba khraw ïa ki nongshongshnong” pynpaw u Waheh Shnong, ha kajuh ka por u la pynpaw ka jingsngew khia halor ka jingsah dien ka shnong ha kaba ïadei bad ki surok, ki lynti ki syngkien bad ki skul bad la khmih lynti ba ka tnat CSR kan pynioh ïa ka surok ruh ban kham pynsuk ïa ki nongshong shnong ha ka leit ka wan, namar ïa mynta hi ki paidbah ki ïaid na la lynti ba shna ka company hi tangba ka dei ka surok kaba dang sniew, ka don ka bynta kaba ju twa ka khyndew bad ha kane ka bynta ka company ka la shna noh da ka jingkieng bad ka kynroh kaba skhem ba ka um kan nym lynshop ïa ka surok ban lait na ka jingtwa ka khyndew.
Na ka liang u Secretary Shnong Pandare, u bah Samson Swer, u la iathuh ba ïa kane ka shnong la seng naduh u snem 2003 bad ka dang ioh sanat kum ka shnong ba pura dei ha u snem 2019, u pynpaw ka jingsngew khia halor ka jingkynduh jingeh ha ka leit ka wan namar ka jingbym biang ka surok “Ngi dei ki nongrep kiba ju rep ïa u kwai, tympew, synsar bad rep soh, ngi kynduh jingeh ha ka kit ka bah ban pynpoi ïa ka mar rep sha duh ki jaka ba lait kali, don ki por ngi hap ai nong ha ka kit ka bah, katba ki mar rep jong ngi kim dei kita ki mar kiba ïohnong shibun, kumta haba siew bai kit bai bah ngi ïohnong noh sa tang khyndiat, kane kam sngew myntoi shuh ïa ngi, hynrei da ka jingwan ka Star Cement, ngi la ioh ïa ka surok kaba la ïarap malu mala ïa ngi ban pynpoi ïa ki mar rep sha ki jaka ba lait kali”
U bah Samson Swer, u la pynpaw ruh ka jingsngew khia halor ka jingbym don skul hapoh shnong, kumba la ong ba hapoh kane ka shnong kam don wat tang ka skul SSA ruh, u la ong ba ki khynnah kiba dang rit, kumba lai, saw snem, ki dang hap shong iïng namar kim pat lah ban ïaid kjat shaduh shnong Brichyrnot ban leit skul, ki khynnah ki ïoh ban leit skul haduh ba kin da kham heh bad kham khlaiñ ban iaid kjat, kumta na ka liang utei u Secretary shnong Pandare, u buh ka jingkyrpad ïa ka sorkar jylla bad kumjuh ruh ïa ka sorkar pdeng ba kan sngewbha ban phai khmat lem sha kane ka shnong kaba dang donkam haduh katta katta ïa ka jingkyrshan ba radbah jong ka sorkar ha baroh ki liang bad u la kynthoh ruh ba “Ka sorkar kan ju peit lem ïa ngi bad ngi la shah ieh beiñ ha baroh ki liang”
U heh jong ka Company Star Cement Lumshnong, u Devander.K.Bansal, uba dei ruh u Representative Management, u la pynpaw ka jingsngew kmen halor ka jinglah ka tnat CSR ban pyndep ïa ka kam ban ai bor ding Solar Energy ha shnong Pandare, u la ong ba mynta ki paidbah jong ka shnong Pandare ki la long lem kumba long kiwei, ki la ioh ban peit tv, ki la ioh ban pyndonkam ïa ki pangkha (fan), ki refrigerator, ki la ioh ban charge ïa ki mobile jong ki, khamtam eh ki khynnah skul ki la ioh ïa ka jingshai bor ding ban pule kot ha ki por mynmiet, u la iathuh ba ki 202 tylli ki long iïng ba kynthup ar tylli ki iïngmane, ka la don kawei ka panel (1-panel) kaba kit haduh 52000 haduh 55,000 kawei ka unit.
U la pynpaw shuh shuh ba ka tnat CSR, ka la lah ruh ban pyndep ïa ki surok ki ban pyniasoh bad ki surok heh (Road Conectivity) ha ki thaiñ khappud, ba kynthup ha shnong Borsora bad ha Shnong Shymplong “Na ka liang ka tnat CSR, ngin nang ïai trei shitom bad ïatreilang bad ki paidbah ban kyntiew ïa ka thaiñ” ong u Devander Bansal.
Ha kane ka jingleit jurip u mawphor ïa ka shnong Pandare (elaka Narpuh), nalor u Waheh Shnong, u Secretary Shnong, la ïa don ryngkat lang ruh ki dkhot ka Dorbar Shnong kiba kynthup u bah Medring Nongtdu, u bah Dipty Sangma, u bah Bires Swer, u bah Nicholas Tongper,, Daming Dkhar, Sobiron Pohtam, u bah Danys Khonglah, u bah Wanmon Nongtdu, ka kong Sukmon Suchiang lem bad kiwei kiwei, kiba kynthup ruh ki longkmie jong ka shnong Pandare.